Konman ou kapab konpran Labib
Lir avek en lespri ouver
Eski en zanmi in deza rakont ou serten keksoz negatif lo en dimoun ki ou pa’n zanmen fer konnesans avek? Finalman kan ou ti rankontre sa dimoun, eski sa ki ou zanmi ti’n deza dir ou lo li, ti anpes ou vwar talan ek bon kalite ki sa dimoun i annan? En keksoz parey i osi kapab arive an sa ki konsern Labib.
ZAPOT Pol ti averti kwa ki kapab arive si nou pa lir Labib avek en lespri ouver. I ti ekrir sa konsernan serten Zwif dan son letan: “Zot ranpli avek motivasyon pour Bondye, me zot motivasyon pa baze lo en vre konnesans.”—Romen 10:2.
Parmi bann Zwif dan premye syek, i ti annan serten ki pa ti oule aksepte ki Zezi ti sa Mesi, menm si sa ti kler dan Lekritir Ebre. Zezi ki ti sorti Nazaret ti ranpli tou sa bann kriter ki Lekritir Ebre ti fer resorti e i ti akonplir tou bann profesi ki ti’n ganny predir lo Mesi. Me akoz son bann konpatriyot ti napa sa lespri ouver, setadir zot pa ti ase fleksib dan zot fason panse, sa ti anpes zot konpran Parol Bondye.
Ki nou kapab aprann atraver sa? I enportan pour lir Labib avek en lespri ouver. Kan en dimoun pa oule sanz son lide oubyen kan i pa fleksib, sa i kapab vin en baryer ki anpes li konpran laverite dan Labib.
Par egzanp, en profeser larelizyon an North Carolina, Leta-z-ini, ti dekrir Labib konman “en liv ekrir par zonm, avek bann pwennvi imen, ki bokou ladan i diferan avek kanmarad e zot tou zot pa donn nou sa gidans neseser lo lavi ki nou kapab depan antyerman lo la.” Si en dimoun i lir Labib avek sa latitid ki i “en liv ekrir par zonm,” eski i pa ti pou annan tandans pour rezet bann prensip oubyen gidans ki pa dapre son gou?
Parkont, Labib i ankouraz nou pour fer bokou zefor pour etidye Lekritir seryezman. Konsernan bann dimoun dan lavil Bere dan letan Pol, Lekritir i dir ki “zot ti resevwar Parol Bondye avek bokou lentere. Toulezour zot ti etidye Lekritir pour war si sa ki Pol ti dir zot ti vre.” (Akt 17:11) Parey sa bann dimoun, petet ou pou bezwen retir okenn baryer, parey ou pwennvi personnel oubyen kritik ki kapab anpes ou byen konpran Labib. Alors, lir Labib avek en lespri ouver e avek sa lanvi pour konpran sa mesaz tre enteresan sorti kot son Loter.