Eski Bondye i promet ou larises?
‘Bondye i anvi ou vin ris, ki ou annan detrwa loto ek en biznes ki pe prospere. Zis krwar dan li, ouver ou portfey e donn li tou sa ki ou kapab.’
DAPRE en zournal Brezil, sa i en mesaz ki pe ganny promote par serten group relizye dan sa pei. En kantite dimoun in pran sa mesaz o serye. Dapre en sondaz lopinyon parmi bann dimoun ki dir zot Kretyen Leta-z-ini, magazin Time ti raporte ki “61 poursan i krwar ki Bondye i anvi ki dimoun i vin ris, e 31 poursan . . . ti dakor ki si ou donn Bondye ou larzan i pou rekonpans ou avek plis larzan.”
Sa bann kalite krwayans pe propaz vitman e bokou dimoun pe al dan sa bann legliz ki ansennyen ki Bondye pou fer dimoun vin ris. Sa i sirtou leka dan bann pei sid Lanmerik tel parey Brezil. Me selman, eski Bondye i vreman promet larises tou bann ki servi li? Eski tou Son bann serviter dan lepase ti ris?
I vre ki dan Lekritir Ebre, souvandfwa Bondye ti beni bann dimoun avek larises materyel. Par egzanp, Deterononm 8:18 i dir: “Ou bezwen mazin Zeova ou Bondye, akoz li ki donn ou lafors pour ou vin ris.” Sa ti asir bann Izraelit ki si zot ti obeir Bondye, i ti pou fer zot vin en nasyon prospere.
Me ki nou kapab dir lo bann serviter Bondye endividyelman? Zob, en serviter fidel, ti annan gran larises e apre ki Satan ti’n detrir tou sa ki Zob ti annan, Zeova ti rekonpans sa serviter par “double lakantite” tou sa ki Zob ti’n perdi. (Zob 1:3; 42:10) Abraam osi ti ris. Zenez 13:2 i dir ki i ti “annan en ta zannimo, larzan ek lor.” Kan larme kat lerwa ki ti’n zwenn ansanm ti kaptir son neve Lot, Abraam “ti rasanble son bann zonm ki ti’n pare pour lager, trwa san dizwit lesklav ki ti’n ne dan son lakour.” (Zenez 14:14) Vi ki Abraam ti annan 318 zonm ki ti’n “pare pour lager,” sa i montre ki i ti bezwen annan en bon pe dimoun kot son lakour. Lefet ki i ti kapab siport sa kantite dimoun i fer vwar ki Abraam ti vreman ris e annan en kantite zannimo.
Wi, bokou serviter fidel Bondye dan lepase, par egzanp Abraam, Izaak, Zakob, David, Salomon, pour nonm zis enn de, ti ris. Me eski sa i vedir ki Bondye pou fer tou sa ki ador li vin ris? De lot kote, eski i vedir ki en dimoun ki mizer pa ganny benediksyon Bondye? Lartik ki swiv pou diskit lo sa bann kestyon.