Akoz bokou maryaz pa reisi?

“En bann Farizyen ti vin kot [Zezi] e esey met li dan en pyez. Zot ti demann li, ‘Eski nou lalwa i permet en zonm divors son madanm pour nenport ki rezon?’”​—Matye 19:3.

SERTEN dimoun ki ti viv dan letan Zezi ti demann zot lekor si vreman maryaz i kapab oubyen devret dire. Zezi ti dir avek zot: “Zot pa’n lir, ki depi okonmansman kreater ti fer zot mal ek femel, e ti dir: ‘Pour sa rezon, en zonm pou kit son papa ek son manman pour ini avek son madanm, e toulede zot vin en sel laser.’ Zot nepli de me en sel. Alor sa ki Bondye in ini ansanm zonm pa devre separe.”a (Matye 19:4-6) I kler ki Bondye ti anvi ki maryaz i dire.

Dan bokou pei ozordi, apepre 40 poursan oubyen plis parmi tou bann koup marye i “separe” e finalman divorse. Eski bann konsey Labib lo maryaz nepli itil? Eski i posib ki maryaz pa pe reisi akoz i annan en defo avek sa laranzman li menm?

Annou egzamin en legzanp: De koup i aste sakenn en loto. Tou le de loto i menm model. En koup i mentenir zot transpor byen e zot dray li avek bokou prekosyon. Zot loto pa donn zot okenn gro problenm. Sa lot koup pa pran letan oubyen fer zefor pour mentenir byen zot transpor e zot dray li san pran okenn prekosyon. Sa loto i kase e i ganny abandonnen. Eski problenm ti avek sa dezyenm loto oubyen avek met sa loto? I evidan ki met sa loto ki responsab pour sa ki’n arive.

Pareyman, menm si en kantite maryaz pa reisi, sa pa vedir ki i annan defo avek sa laranzman maryaz. Kan nou vwar sa plizyer milyon maryaz ki reisi, sa i prouve ki i pa leka. Sa bann maryaz i anmenn boner ek stabilite pour bann endividi, fanmir ek kominote. Parey en loto, maryaz osi i bezwen ganny pran bon swen avek, e pour li dire i bezwen ganny mentenir regilyerman.

Ki swa ou’n fek marye oubyen ou’n marye pour bokou lannen, konsey ki Labib i donnen lo ki mannyer pour mentenir e ranforsi li, i vreman marse. Vwar serten legzanp lo sa bann paz ki swiv.

[Not anba lo paz]