En Privilez Disponib pour bann Zanfan
1 Bokou ki paran ozordi i gard en bon souvenir, en privilez ki zot ti kontan etan en zanfan ki pe grandi dan laverite—aktivite Zournen Magazin. Sa travay ti ganny enstitye dan tou kongregasyon an 1949. En fwa par semenn, tou dimoun ti pou konsantre lo distribisyon La Tour de Garde ek Réveillez-vous! lo semen, port-an-port, dan bann magazen e dan lezot fason. Bann ki pli zenn ti spesyalman antouzyasme pour partisip dan sa travay akoz i ti donn zot en loportinite pour pran par dan menm aktivite ki bann adilt dan kongregasyon. Eski sa ti vre dan ou ka letan ou ti en zanfan?
2 Enplik Ou Zanfan: Bann pli pti zanfan ki pa ankor pare pour konmans en diskisyon Biblik devan laport, i kapab kanmenm ofer bann magazin. Sa i demann aprann selman en senp prezantasyon dan ennde fraz. En komanter bref, petet lo kouvertir sa magazin, i kapab sifi. Plizyer dimoun i fasilman aksepte magazin ki nou bann zenn i prezante, e zot souvan fer komanter favorab lo senserite e bon kondwit sa bann zenn. Avek en pti led, sa servis i en keksoz ki bann zanfan i kapab fer tre byen, e i fer en kontribisyon presye dan difizyon mesaz Rwayonm. Byensir, ofiramezir ki zanfan i grandi, zot paran pou ed zot pour kontinyen fer progre an devlopan zot abilite pour prese.
3 Manuel ti konmans pres port-an-port kan i ti annan trwa an. Son paran ti ansenny li pour memoriz en prezantasyon bref. Avek larder, i ti pres ansanm avek zot, plas plizyer magazin, brosir ek trak. I ti osi pres enformelman. En fwa kan son paran ti anmenn li dan en zarden zanfan pour detann, i ti pran linisyativ pour plas serten trak avek lezot dimoun ki ti laba. Menm si i ankor byen zenn, lantouzyasm Manuel pour minister i en sours vre lankourazman pour son paran e pour kongregasyon antye.—Prov. 22:6.
4 Sak Sanmdi in ganny dezinyen koman “Zournen Magazin” lo Calendrier des Témoins de Jéhovah 2000. Paran, nou konsey zot pour renouvle zot lentere dan sa travay, e ed zot zanfan pour partisip pli regilyerman posib dan sa servis privilezye.