Trouv Lazwa dan Ou Servis Sakre
1 Zot ti retournen “avek lazwa.” Resi biblik i eksprimen koman 70 disip Zezi ti santi kan zot ti prezant zot devan Zezi, swivan en tour predikasyon prolonze. Zot ti resanti oprofon zot en gran plezir an travayan pour lavolonte Bondye. (Lik 10:17) Kwa ki kapab ed ou pour trouv en lazwa parey dan servis sakre?
2 En Latitid Pozitif: Zeova in akord ou en privilez pour ansenny dimoun lo son gran desen. Par ou predikasyon ou kapab ede pour liber en endividi dan bann pratik degradan sa monn e dan lasenn fo relizyon. Ou kapab ofer dimoun lespwar pour viv dan en monn debarase avek diskord, ki otour nou ozordi. Mazin lazwa ki Zeova i annan kan ou reisi plant en legren laverite dan en leker ki dispoze pour ekoute. Reste pozitif an priyan ki lespri Bondye i prodwi dan ou fri lazwa, tou an pourswivan minister avek tou ou leker.
3 Formasyon Pratik: Sesyon lenstriksyon ki Zezi ti kondwir avek sa 70 disip, i konparab avek en Renyon Servis ozordi. I ti donn formasyon afen ki zot a kapab akonpli zot minister efektivman. (Lik 10:1-16) Ozordi Renyon Servis i form ou dan bann diferan fason pour apros dimoun, pour demar konversasyon e pour konmans e kondwir bann letid Labib. Kan ou aplike e amelyor ou abilite prese, ou pou vwar ki nenport santiman malez oubyen ensifizan ki petet ou ti annan, pou diminyen e ganny dominen par konfyans ek lazwa.
4 Fikse Regar lo Lavenir: Zezi ti trouv lazwa dan son servis sakre malgre bann soufrans ki i ti sibir. Akoz? Parski i ti kit son lizye partikilyerman fikse lo bann benediksyon ek privilez ki ti’n ganny plase devan li. (Ebre 12:2) Ou kapab fer parey ou osi an gardan ou lespri ek leker fikse lo non Zeova e lo bann benediksyon ki pou vini dan son nouvo monn. Sa pou kontribye pour ogmant ou lazwa ek sinifikasyon ki ou minister i annan.
5 Rann en servis sakre Zeova i pli gran privilez ki ou kapab annan ozordi. Alors, nou swete ki ou dir: “Pour fer ou lavolonte, O mon Dye, mon’n pran plezir.”—Ps. 40:8.