Apresye bann Piblikasyon an Kreol Seselwa
1 Dan Revelasyon 7:9, 10, en gran lafoul sorti dan tou nasyon ek tribi ek pep ek lalang i debout pe loue Zeova. Sa vizyon i revel klerman ki Bondye pa fer lapreferans e ki i pa konsider en langaz pli siperyer ki en lot. Lapannkot 33 N.L., Zeova ti permet son bann fidel disip pour koz dan diferan langaz afen ki sa bon nouvel lo Rwayonm i kapab propaze parmi tou pep, nenport langaz ki zot koze. Akt 2:8 i raporte ki sa bann dimoun ti etonnen ler zot ti antann bann disip pe koz dan zot ‘prop lalang ki zot ti ne.’ Plitar, 3000 ti batize e disip Zezi ti pran en lelan remarkab. Listwar modern pep Zeova in osi montre koman laverite in nabou atenn bann diferan pep oubyen langaz lo later. Se pour sa rezon ki Konsey Direkter Temwen Zeova i vwar sa nesesite ki sa bon nouvel i ganny prese dan langaz ki dimoun i pli byen konpran, pour ki sa mesaz i tous leker e i permet ki tou kalite zonm i ganny sove.—1 Tim. 2:4.
2 Avek sa lide antet, Lasosyete in fer provizyon pour konmans tradwi bann piblikasyon an Kreol Seselwa. Ziska prezan nou’n byen servi bann piblikasyon an Angle ek Franse ensi ki 2 brosir ek 2 trak an Kreol. Me mwan Mars, nou ti tre ere pour resevwar nou premye kopi Nou Minister Rwayonm. Eski nou satisfe avek sa bann provizyon? Koman nou kapab byen servi sa bann zouti ki Zeova i konfye nou?
3 Vin Familye avek Lekritir Kreol: Lamazorite nou i koz Kreol, me petet pa tou dimoun ki lir e ekrir sa langaz. Alor ki nou devret fer? Vi ki tou nou bann renyon i ganny dirize an Kreol e ki sa i osi langaz ki nou pe servi dan predikasyon, i tre profitab ki nou aprann byen lir e ekrir sa langaz. L’Annuaire 1997 i rakont leksperyans en ser 74 an, ki ti aprann lir pour li kapab ansenny plizyer dimoun laverite lo desen Bondye. Eski serten manm ou fanmiy oubyen ou letid liv ti a kapab ed ou? Si ou motive, ou pou kapab reisi. Liv Prédicateurs paz 480, i eksplike koman en Temwen ti pran li zis sis semenn pour aprann lir. Si nou fer sa zefor, alors sertennman Zeova pou beni nou ofiramezir ki nou mars menm vites avek son lorganizasyon.
4 Bann Nouvo Lekspresyon: Oparavan nou ti pret bann mo teokratik avek Franse ler nou ti koze. Toutfwa, vi ki Kreol i en lalang ekrir, ki annan diksyonner, en leksik ek bann lareg, i’n vin neseser pour swazir bann lekspresyon teokratik an Kreol, ki nou ava kapab byen konpran e prononse. Par egzanp, Surveillant de circonscription in vin sirveyan rezyonal, oubyen pionnier permanant, pionye ordiner. Serten i kapab demande akoz? Par egzanp, Lasosyete in eksplike ki sa mo regular pioneer an angle, i pa fer referans avek lide ki sa pionye i regilye me plito pour montre diferans ki annan ant en pionye spesyal ek en pionye ordiner, vi ki zot napa menm kantite er-d-tan pour fer, par kont en proklanmater i kapab fer pionye asistan dan en fason permanan e i alor vin en pionye asistan permanan. Sa bann pti azisteman pou permet ki nou esey swiv pli pros sinifikasyon bann term ki Konsey Direkter ti’n selekte depi konmansman, me dan lekspresyon Kreol. Alors i pou benefisye nou, si nou adapte avek serten nouvo lekspresyon an mezir ki zot aparet dan bann piblikasyon e ki nou esey servi zot dan nou bann repons oubyen ekspoze.
5 Koman nou kapab remarke, non bann liv Labib oubyen bann personnaz pa ekrir parey dan La Traduction du Monde Nouveau an Angle ek an Franse. Par egzanp, Hezekiah i pronons Hizqiya. Alor, swa ki’n ganny fer se ki nou pou kreoliz bann non koman zot ganny prononse dan Labib an Franse, ensi Hizqiya i pou ekrir Izkiya oubyen Jérusalem, Zerizalenm. Non Bondye i Zeova e non son garson i Zezi. Brosir Le Nom Divin i montre plizyer legzanp bann pei ki pronons non Bondye dan en fason ki adapte avek zot langaz. I pou pran en pe letan pour nou byen abitye avek sa bann non me finalman nou pou vwar li byen natirel dan nou langaz. Nou pou osi remarke ki bann zanfan pou pli byen profit bann renyon.
6 San okenn dout, nou rekonesan ki Zeova in fer posib sa nouvo laranzman e sa pou rapros nou avek li akoz i pou permet nou, koman bann ‘nouvo ne, pour devlop en dezir ardan pour dile pir laparol.’ (1 Pyer 2:2) Annou byen servi sa bann piblikasyon kan nou etidye, prepar nou bann renyon e osi dan predikasyon. Alor, nou a kapab montre nou en zouvriye ki servi byen provizyon ki ganny donnen par nou Gran Ansennyan.