“Zot Travay Pa Anven”
1 Pa sa panse i ankourazan! Dan servis Zeova, ou travay pa anven. (1 Kor. 15:58) Parkont, reflesir konman dimoun i travay bokou e efors zot pour esey amelyor zot pozisyon dan lavi, oubyen zot sitiasyon finansyel. I annan ki pourswiv ledikasyon pli onivo pour bokou lannen oubyen esklav pour al pli devan lo plan materyel. Pourtan, akoz “letan ek levennman enprevi,” zot kapab pa zanmen atenn sa prestiz ki zot ti pe serse, oubyen zot kapab oblize viv avek bokou mwens ki zot ti anvi materyelman. Parey kelken ki pe “pourswiv divan,” zot zefor i anven. (Ekle. 1:14; 9:11) Konman i enportan, alor, pour nou annan bokou pour fer dan sa sel travay ki pa anven parski i annan en valer dirab!
2 Travay ki Vreman Annan Valer: Pres sa bon nouvel lo Rwayonm Bondye, i travay pli enportan ki annan lo later. I en travay ki bezwen ganny fer ki swa dimoun i ekoute ou non. Nou ti a voudre dir, parey Pol ti dir: “Mon pa responsab. Parski mon pa’n negliz nanryen pour anons zot plan Bondye an antye.”—Akt 20:26, 27.
3 Pa i en gran lazwa kan dimoun i ekoute e reponn favorableman lapel sa mesaz Rwayonm! En zenn madanm ti perdi son tantin dan lanmor. I ti demann son lekor kote son tantin ti’n ale—dan lesyel oubyen dan lanfer? I ti priy Bondye pour ed li, an servan non Zeova, parey son ser ti’n aprann li pour fer. En pe letan apre i ti pe etidye Labib e asiste bann renyon Kretyen. I ti ganny en nouvo pwenn-vi lo lavi e i ti aret tou frekantasyon avek bann geng dan semen. Sa zenn madanm ti aret fimen, pran drog, e vole. I ti admet: “Selman lanmour pour Zeova ki’n fer mwan kit sa move lavi. Zis Zeova, par son gran mizerikord, ki ti a kapab donn mwan lespwar pour lavi eternel.” I nepli depans son lavi dan bann aktivite anven.
4 Menm kan bann dimoun i refize ekoute, nou pe touzour akonpli en keksoz ki vo lapenn. Zot konnen ki Temwen Zeova in vizit zot. Ou prop lentegrite, fidelite ek lanmour in ganny ranforsi. Alor, eski ou zefor dan travay Senyer i anven? Zanmen!