Eski Ou Apresye Pasyans Zeova?
1 Si Zeova pa ti pasyante pour sa bann dernyen 10 an, 20 an, e plis, e permet ki en temwannyaz prolonze i ganny donnen, eski ou ti pou’n konn laverite? Konman nou rekonesan ki i’n permet bokou plis dimoun “arive repanti.” Pourtan, gran zour zizman Zeova “pou ariv konman en voler.” (2 Pyer 3:9, 10) Alor, pasyans Bondye pa devret ganny mal enterprete konman en retar pour anmenn lafen sa sistenm.—Aba. 2:3.
2 Annan Pitye pour Dimoun: Pasyans Zeova i depas nou konprenezon. Nou pa devret oubliy son bi. (Yona 4:1-4, 11) Zeova i vwar kondisyon deplorab limanite e i annan konpasyon pour zot. Zezi i santi parey li osi. Vi ki i ti annan pitye pour bann lafoul ki i ti pres avek, i ti anvi ki sa travay evanzelizater i agrandi afen ki plis dimoun i annan loportinite pour ganny lavi eternel.—Mat. 9:35-38.
3 Kan bann trazedi ek dezas i arive, pa nou panse i al pour bann ki pa konn laverite? Ozordi, dimoun i parey “bann mouton ki napa berze” kan zot esey fer fas avek, oubyen esey konpran sa konfizyon ki annan dan lemonn. (Mark 6:34) Nou rekonfort bann ki annan leker senser e demontre nou lapresyasyon pour pasyans Zeova, kan nou pres sa bon nouvel avek zel.—Akt 13:48.
4 Nou Travay I Irzan: Lannen pase, 323,439 dimoun ti batize e plis ki 14,000,000 ti asiste Memoryal. Pa i annan en gran potansyel pour bokou plis dimoun sorti vivan dan destriksyon sa sistenm mesan! Ki grander sa “gran lafoul” pou ete, nou pa konnen. (Rev. 7:9) Ki kantite letan nou misyon pour prese pou dire, nou pa konnen. Me Zeova i konnen. Sa bon nouvel pou ganny prese ziska ki i satisfe, “e apre sa, lafen pou arive.”—Mat. 24:14.
5 Letan ki reste pe diminyen, e zour Bondye pe menas nou. (1 Kor. 7:29a; Ebre. 10:37) San dout, “delivrans i pli pre avek nou ki ler nou ti kwar pour premye fwa.” (Rom. 13:11) Annou pa ferm lizye lo rezon pour pasyans divin. Plito, annou pres avek irzans afen ki bann ki vreman anvi lazistis i a eksperyans gran mizerikord Zeova.