Eski Ou Pe Andire?
1 “Napa en pli gran lazwa pour mwan ki ler mon tande ki mon bann zanfan i [kontinyen] swiv laverite.” (3 Zan 4) Landirans bann zanfan spirityel Zan ti aport li bokou lazwa. I bezwen fer plezir nou Papa seles pour vwar plizyer milyon son bann fitir zanfan pe kontinyen “swiv laverite”!—Prov. 23:15, 16; 27:11.
2 Alor ki pep Bondye pe zeneralman persiste dan aktivite Kretyen zele, serten in gradyelman ralanti. Menm si petet sa bann dimoun ti ranpli avek lenerzi kan zot ti aprann laverite pour premye fwa, avek lannen ki’n pase, zot in adopte en routin pour fer selman en pti gin oubyen partisip rarman dan sa travay pour fer disip.
3 Natirelman, serten i kapab ralanti akoz bann limit fizik ek bann lenkonvenyans ki lavyeyes i anmennen. Sepandan, zot bezwen ganny felisite pour zot landirans. Zot pe fer sa ki zot kapab. Me tou sa ki’n dedye son lavi pour Bondye i devret demann son lekor: ‘Eski mon’n les mwan konsantre tro bokou lo bann lokipasyon personnel ki lentere Rwayonm i okip selman en pti gin plas dan mon lavi? Eski mon’n vin plito “tyed,” oubyen eski mon ankor pe fer zefor “entans”?’ (Rev. 3:15, 16; Lik 13:24, NW) Nou swete ki nou tou nou reflesir dan lapriyer, lo sa ki nou pe fer, fer bann amelyorasyon kot i neseser, e kit antet ki Zeova i promet pour fourni “laglwar loner ek lape pour tou dimoun ki pratik sa ki byen.”—Rom. 2:10.
4 Konman pour Andire: Kwa ki ti ed Zezi pour andire? Pol ti eksplike: “Pour lazwa ki ti ganny plase devan li, i ti andir en poto siplis, mepriz laont e i ti asiz lo kote drwat tronn Bondye.” (Ebr. 12:1-3, NW) Lazwa ki ti ganny plase devan Zezi ti bokou pli gran ki sa bann leprev tanporer ki i ti bezwen fer fas avek. Kit antet sa lazwa ki’n ganny plase devan nou, i kapab ed nou pour andire nou osi. (Rev. 21:4, 7; 22:12) Si nou tourn ver Zeova pour donn nou lafors atraver letid personnel, lasistans regilye pour renyon, ek lapriyer persistan, nou pou kapab persevere dan sa travay ki i’n donn nou pour fer.
5 Zeova i rezwir dan landirans son bann fidel. Alor, annou ogmant son lazwa par kontinyen “swiv laverite.”