Benediksyon Zeova i Fer Nou Ris
1 Lareisit i souvan ganny mezire par groser lapey en dimoun. Se pour sa ki bokou dimoun i konsider bann ki annan larzan konman sa bann ki pli ere e pli satisfe. Malerezman, bann dimoun ki panse ki larzan i kapab fer boner, i tronpe. (Ekle. 5:12) Pour bann “ki oule vin ris” lo plan materyel, napa boner dirab. (1 Tim. 6:9) Parkont, bann serviter Zeova i vreman ere e zot bann dimoun pli ris lo later. (Prov. 10:22; Rev. 2:9) Konman sa i posib?
2 Laprev Nou Larises: Nou posed en konpreansyon spirityel ki ris e en bon konprenezon lo Parol Bondye, Labib. Atraver son lorganizasyon, Zeova pe kontinyelman ansenny nou lo li ek son Garson, pour nou prop benefis eternel. Sa konnesans egzakt i fer li posib pour nou rapros nou avek Zeova e rezwir en relasyon entim avek li. (Zak 4:8) Disteng sa ki bon ek sa ki move e swiv lalwa Bondye, i protez nou kont serten maladi ek danze. Nou annan konfyans ki Zeova pou fourni nou bezwen ki aport an rezilta, lakontantman divin ek lape lespri.—Mat. 6:33.
3 Nou rezwir lape ek linite parmi nou lasosyasyon frer ek ser parski nou kiltiv fri lespri Bondye. Ini par en lyen lanmour solid, nou pa devret zanmen santi nou abandonnen par Bondye ek nou bann frer, kan nou fer fas avek kalamite.—Gal. 6:10.
4 Nou lavi i annan vreman en sans ek en bi. Nou konsider li en privilez merveye pour partisip dan proklanmasyon global sa bon nouvel. Kan nou ed lezot pour antre dan en bon relasyon avek Bondye e servi ansanm avek nou dan ladorasyon pir, sa i anmenn en lazwa dirab. Nou trezor presye—nou minister—i anmenn loner pour Zeova e i donn nou satisfaksyon ki nou’n kontribye ver sangtifikasyon son non. Nou mentenir en latitid mantal pozitif, konsyan ki nou lespwar pour lavenir pou byento ganny realize.
5 Montre Nou Lapresyasyon: Fotespere ki nou touzour rekonesan pour bann benediksyon Zeova, ki fer nou vreman bann dimoun pli ris lo later. (Prov. 22:4) Pran letan sak zour pour medit lo sa ki nou annan, i pous nou pour remersi Zeova pour son lanmour zenere e pour kontinyen donn li nou latasman eksklizif.