Fer Plan Pour Lavenir—Avek Ki Lobzektif ?
1 Nou tou nou fer serten refleksyon lo nou plan pour lavenir. Bann ki annan lesperans teres pe espere pour viv pour touzour dan nouvo monn zis Bondye. Me i annan serten lenfliyans ki kapab retir sa lesperans dan leker en dimoun. I demann en gran zefor pour nou kontinyen santre nou lavi lo bann aktivite ki annan pour fer avek Rwayonm e pa les bann tantasyon dezir laser detourn nou.—1 Zan 2:15-17.
2 Sa monn pa kapab konpran lobzektif bann dimoun spirityel. (1 Kor. 2:14) Pandan ki lezot imen i lite pour atenn popilarite, pouvwar, larises, nou nou rod bann trezor spirityel. (Mat. 6:19-21) Si nou ti esey aziste nou panse avek pwenn-vi lemonn lo lavenir, eski nou ti pou atenn nou bann lobzektif spirityel? To-ou tar, bann preokipasyon toulezour ti pou pran tou plas dan nou leker. Konman eski nou kapab anpes sa arive?
3 “Abiy Zot Avek Nou Senyer Zezi Kri”: En fason pour determinen si nou pe batir nou lavenir otour bann lentere Rwayonm se pour egzamin nou konversasyon. Eski nou pe konstaman koz lo bann keksoz materyel ek bann preokipasyon toulezour? Si wi, nou devret egzaminen si nou leker nepli dan bann valer spirityel. Petet nou bezwen fer en pli gran zefor pour ‘abiy nou avek nou Senyer Zezi Kri olye ki les nou ganny antrennen pour satisfer bann dezir laser.’—Rom. 13:14.
4 Bann zenn i kapab ‘abiy zot avek Kris’ par fer plan pour antre dan minister aplentan dan lavenir. En zenn ti anvi fer pionye ordiner me i ti’n ganny elve dan en kiltir kot son koutim popiler se ki bann zenn zan i stab finansyerman. Se pour sa rezon alor, ki i ti vin sitan okipe dan biznes ziska ki asiste bann renyon e partisip dan predikasyon ti vin zis konman en routin pour li. Enn fwa ki i ti konmans met konfyans dan bann parol Zezi ki trouve dan Matye 6:33 e kit sa kalite lavi fatigan e monotonn ki i ti pe viv, i ti antreprann en karyer dan servis aplentan. Aprezan, avek en bon konsyans, i pe donn ‘tou sa ki i kapab’ pour servi Zeova, parey li menm i dir.
5 Labib i dir ki i saz pour fer plan pour lavenir. (Prov. 21:5) Fotespere ki ler nou fer sa, nou gard lavolonte Bondye premye dan nou lespri.—Efe. 5:15-17.