Fason pli senp pour distribye bann Piblikasyon
1 Fason pli senp pour distribye bann piblikasyon san en pri fiks in aprezan ganny wit an. Eski sa fason in en sikse? I’n sertennman donn plizyer milyon dimoun sa lokazyon pour ‘vin . . . pran delo lavi gratwitman!’—Rev. 22:17.
2 Toutfwa, nou pa oblize, e i pa nou dezir non pli, pour donn bann piblikasyon an bonnavini avek nenport dimoun ki aksepte. Parey nou abitye servi nou bann keksoz materyel avek sazes, se dan sa menm fason ki sak proklanmater i annan sa responsabilite pour byen servi sa bann piblikasyon ki i gannyen san en pri fiks avek Lasosyete dan son kongregasyon. E menm si Lasosyete i fer bann piblikasyon disponib pour bann proklanmater san peye i pa vedir ki i pa koute pour prodwir e distribye. Zis mazinen konbyen i koute pour tradwi, fer marse bann lenprimri, pour aste papye, lank, ek lezot komodite pour enprimen e pour anvoy sa bann piblikasyon ziska dan nou bann zil. Apre, mazin bann frer ki pe travay dan bann lizin Betel. Zot souvan ganny demande pour travay gran maten oubyen tar aswar pour kapab mentenir progranm prodiksyon. Kantmenm sa i kapab deranz zot bann laranzman personnel pour bann renyon oubyen predikasyon, sa bann frer ek ser dan Betel Langleter i vreman kontan pour donn en servis efikas bann kongregasyon dan 33 diferan pei, enkli Sesel.
3 Depi sa wit an, serten rapor in mansyonnen ki bann proklanmater i senpleman donn bann magazin parey bann trak. Sa i pli aparan dan temwannyaz lo semen. Bann pasan dan semen, lo bestop, dan bann zón komersyal, eksetera, zot debaras zot vitman avek bann trak ek lezot papye piblisite. Konman ou santi letan ou vwar nou bann magazin in ganny zete lo trotwar akoz zot in ganny ofer avek bann dimoun ki pa’n ganny demande si zot enterese e oule lir sa bann magazin? Sirman sa pa akseptab akoz i en gaspiyaz letan ek resours ki’n ganny servi pour enprimen e distribye sa bann magazin. Alor, nou ankouraz ou pour rekomann zis sa kantite magazin ki ou krwar ou pou kapab prezante. Sa pou evite ki i annan en gran stok magazin dan bann kongregasyon oubyen avek bann endividi.
4 Nou anvi ki sa bann piblikasyon i atenn zot bi, setadir, pour ed bann dimoun senser pour aprann plis lo bann dispozisyon Zeova ki merveye. I kapab en gaspiyaz pour les piblikasyon avek bann dimoun ki napa lapresyasyon pour keksoz spirityel. (Ebr. 12:16) Pour nobou fer en distribisyon ki prodiktif i depan lo ou abilite pour idantifye bann ki annan lentere senser. En dezir pour fer en konversasyon avek ou i kapab en siny. Oubyen, si sa dimoun i port latansyon letan ou pe koze, reponn ou bann kestyon, e eksprim en lopinyon ki montre ki i enplike dan sa diskisyon. Si i swiv anmezir ki ou pe lir Labib sa i endike ki i annan respe pour Parol Bondye. Souvannfwa, i bon pour demande si zot pou vreman lir sa piblikasyon. I annan plizyer fason kot en proklanmater ki annan disernman i kapab determinen si sa dimoun pou vreman lir sa piblikasyon, kot i ava kapab evite distribye piblikasyon bonnavini.
5 Fodre ekilibre. Si i annan en mank lekilib kot nou zis les bann trak dan travay port-a-port oubyen dan semen, alor lakantite piblikasyon ek magazin ki nou lese, pou seryezman abese e sa bann piblikasyon pa pou kapab akonpli bi ki i’n ganny pibliye. I en pwen kot disernman i bezwen ganny servi. Annefe, bann proklanmater i bezwen fer en zizman lo kisisa ki enteres en dimoun ki i rankontre e apre ofer swa en trak, en brosir, magazin, oubyen liv.
6 Konman ki Lasosyete i kapab donn son bann piblikasyon san demann en pri fiks? Par bann lofrann ki ganny fer ki kouver bann fre pour prodwir e distribye. Se bann serviter Zeova ki prensipalman donn zot soutyen. Bann Temwen Zeova pa depan lo piblik pour soutenir sa aktivite proklanmasyon lo Rwayonm ki irzan. Ziska prezan zanmen nou’n deza anmas en fon avek piblik. Toutfwa, nou apresye bann pti lofrann ki nou gannyen avek bann dimoun ki montre lentere ek rekonesans letan nou rankontre zot dan predikasyon.
7 Toutfwa, i byen ki nou pare pour eksplike briyevman e klerman konman ki nou travay mondyal lansennyman baze lo Labib i ganny soutenir par bann lofrann volonter. Tou bann fon ki nou resevwar nou servi pour kouver bann fre enportan pour nobou akonplir travay predikasyon Rwayonm dan nou lepok. Anplis ki prodiksyon piblikasyon pour distribye dan lemonn antye, Lasosyete i soutenir bann biro brans Lasosyete, bann Betel, bann lekol formasyon ministeryel ek misyonner, bann sirveyan rezyonal, bann sant distribisyon piblikasyon, e bokou lezot servis ki neseser pour kapab akonplir sa misyon ki Zezi ti donn son bann disip.—Mat. 24:14; 28:19, 20.
8 Piblikasyon ek magazin pa ganny vann en pri fiks, me zot pa gratwit. Alor, nou devret asire ki nou piblikasyon baze lo Labib i ganny distribye dan pli gran kantite posib me selman avek sa bann ki montre lentere. Menm, sa kalite piblikasyon ki pe ganny ofer i devret anliny avek zot bezwen e progre dan konnesans Labib. Par egzanp, bann piblikasyon parey, Étude perspicace, Traduction du monde nouveau, Index ek bann volim Latour Veyer ek Réveillez-vous! i esansyelman pour bann dimoun ki annan en bon konnesans lo Parol Bondye oubyen ki pe asiste bann renyon. Normalman nou pa ofer zot avek piblik. Zapot Pol ti rapel nou ki “dile” Parol Bondye i pour bann ki napa leksperyans konsernan sa ki byen ek sa ki mal tandis ki “nouritir solid i pour bann adilt” ki kapab dizere e benefisye avek en letid profon dan Labib.—Ebre 5:13, 14.
9 Annou sezi sa loportinite pour remersye tou dimoun pour zot zenerozite pour soutenir sa travay mondyal. Ou soutyen in ede pour kouver en pe bann depans ki Lasosyete in fer pour kapab pran swen avek bezwen spirityel e materyel dan nou bann zil.
10 Anmezir ki nou elarzi nou minister avek zel, an servan bann piblikasyon presye Lasosyete, Zeova pou kontinyen fer nou ogmante. Bann dimoun byen dispoze pou apresye nou minister e avek plezir zot pou eksprim zot soutyen atraver bann lofrann volonter. Annou alor kontinyen montre disernman pour servi sa bann zouti dan en fason pli efektif dan nou aktivite predikasyon Rwayonm.
(Kontinyen lo p. 7 )
Distribye (Kontinyasyon)