Ki Lenportans Lasosyasyon Kretyen i annan?
1 “Napa okenn zonm ki en zil.” Sa deklarasyon par en poet an 17 tyenm syek i senpleman repet sa ki Labib i dir konsernan en bezwen debaz imen—lasosyasyon. (Prov. 18:1) Nou lasosyasyon Kretyen i satisfer sa bezwen. Dan ki bann fason itil?
2 Dan Predikasyon: En pli gran benefis se lafason ki nou bann frer ek ser i fortifye e siport nou dan predikasyon. Zezi ti anvoy son bann disip “de par de” pour al prese. (Mark 6:7; Lik 10:1) Anliny avek sa model, kan nou travay avek lezot dan predikasyon, nou eksperyans sa laverite ki’n ganny rikorde dan Eklezyast 4:9, 10. Anmezir ki nou travay ansanm dan predikasyon, lafwa, lobeisans, ek lanmour nou bann konpanyon i ranpli nou avek kouraz e renouvle nou zel.
3 Pour Led personnel: Nou lasosyasyon frer i osi en sours lankourazman ek gidans pour fer fas avek bann presyon e pour reziste tantasyon. Nou bann konpanyon Kretyen i kapab diriz nou latansyon lo pasaz Labib ki konsern nou personnelman. Zot menm kapab priy pour nou, zis parey nou fer pour zot. (2 Kor. 1:11) E sertennman zot bon legzanp i motiv nou pour fer bann bon travay e i fortifye nou.
4 Dan bann Renyon: Nou rezwir benediksyon ki lasosyasyon Kretyen i ofer letan nou asiste bann renyon kongregasyon regilyerman. (Ebr. 10:24, 25) Sa progranm i ris avek lenstriksyon spirityel, e nou prezans dan bann renyon i gard nou pre avek nou bann konpanyon Kretyen. Sa bann rasanbleman i donn nou loportinite pour antann nou bann frer ek ser eksprim zot lafwa, swa lo lestrad oubyen dan lodyans. (Rom. 1:12) Nou lyen lasosyasyon i vin pli for letan nou konverse avan e apre bann renyon. Bann tel lokazyon i donn nou loportinite pour rakont nou prop leksperyans ki batir lafwa lezot. Nou personnalite i ganny enfliyanse dan en fason pozitif kan nou asosye volonterman avek sa bann ki kontan Zeova, son Parol, son travay, ek son pep.—Fili. 2:1, 2.
5 Nou bezwen nou bann konpanyon Kretyen. San zot, mars dan sa semen sere ki anmenn ver lavi pou vin pli difisil. Me, avek zot lanmour ek lankourazman, nou kapab kontinyen mars ver nouvo monn drwat Zeova.—Mat. 7:14.