Fanmiy ki for spirityelman—Konman?
1 Bann fanmiy Kretyen i ganny felisite pour ‘demontre zot lafwa anver zot prop fanmiy.’ (1 Tim. 5:4) Sepandan, avek sitan bokou move lenfliyans otour nou ki kapab afeblir nou lafwa, i esansyel ki bann fanmiy i travay dir pour reste for spirityelman. Konman sa i kapab ganny akonpli?
2 Egzers Lotorite parey Kris: Bann sef fanmiy i bezwen imit Zezi Kri dan lafason ki zot desarz zot responsabilite pour fortifye zot manm fanmiy. Zezi pa’n zis demontre son lanmour pour nou enn fwa pour tou, atraver son lanmor sakrifisyel, me i pe kontinyen ‘nouri e pran byen swen’ avek kongregasyon. (Efe. 5:25-29) Bann paran ki annan lanmour i swiv sa legzanp lafeksyon par okip bezwen spirityel zot fanmiy sak zour. Sa i enkli kondwir en letid Labib an fanmiy sak semenn, fer bann diskisyon spirityel oprofon e apropriye ler i posib, e adres bann problenm ki arive.—Det. 6:6, 7.
3 Dan Predikasyon: Tou manm fanmiy i devret rekonnet ki pres avek lezot konsernan Zeova ek son plan i en par enportan dan zot ladorasyon. (Iza. 43:10-12) Si ou konman en paran ou anvi ou zanfan vin bann Temwen fidel Zeova, ou devret konmans prepar zot leker pour predikasyon byen boner. Diskit bann rezon akoz i neseser pour annan en leta lespri sakrifis dan predikasyon e pour partisip ladan sak semenn. (Mat. 22:37-39) Apre fer bann laranzman pour zot partisip regilyerman avek ou dan predikasyon.
4 Deplis, ed ou fanmiy pour konpran lenportans predikasyon par met dekote en pe letan pandan letid fanmiy ki ganny fer dan lasemenn pour prepar e egzers en prezantasyon efikas. Donn ou zanfan formasyon personnel dan predikasyon, par ed zot pour fer progre dapre zot laz ek abilite. Apre ki zot in pas en pe letan ansanm dan predikasyon, diskite konman ki zot in vwar labonte Zeova pour zot menm. Rakont bann leksperyans ki batir lafwa. Pli bann fanmiy i “goute konman Senyer i bon,” pli zot pou vin pli pros avek Zeova, e sa pou fortifye zot pour reziste “tou kalite mesanste.”—1 Pyer 2:1-3.
5 Dan bann Renyon: I vreman byen kan bann manm fanmiy i ed kanmarad pour asiste tou renyon kongregasyon, sirtou si enn i fatige, dekouraze, oubyen akable avek traka! “Ler mon papa i vini sorti travay, i fatige,” en zenn ser ti dir. “Me mon partaz avek li en bon pwen ki pou ganny diskite dan renyon sa swar, e sa i ankouraz li pour ale. E ler mon santi mwan fatige, i ankouraz mwan pour ale.”—Ebr. 10:24, 25.
6 Fer Keksoz ansanm: Bann fanmiy i devret fer keksoz ansanm, tel parey ede avek bann travay ki annan pour fer dan lakour. Zot devret osi met dekote letan pour bann aktivite rekreasyonnel ki byen apropriye. Al piknik, marse, zwe, e vizit bann fanmiy oubyen zanmi i kapab vin bann moman zwaye e bann bon souvenir pour rapel.—Ekle. 3:4.
7 Bann fanmiy ki solid i sirmont bann lobstak anver zot spirityalite ki zot rankontre dan lavi toulezour. Par vin pli pros avek Zeova, zot eksperyans sa lafors ki Zeova i fourni.—Efe. 6:10.