En Let Sorti Kot Konsey Direkter

Ser Frer ek Ser:

I en gran plezir pour ekrir zot! Nou felisit zot pour lanmour ek sakrifis ki zot pe kontinyen demontre. Dan sa Annuaire, ou pou vwar ki bokou bann bon keksoz in ganny akonpli pandan sa dernyen lannen servis. Ankor enn fwa, nou’n depans plis ki en bilyon er-d-tan dan travay predikasyon ek lansennyman, par direkteman ankouraz dimoun pour apros avek Zeova. Pa i en loner pour vin bann konpanyon travay nou Bondye glorye e Papa seles?—1 Kor. 3:9.

Ler nou get travay devan nou, nou konfidan ki zot pou kontinyen imit devouman ek lafwa bann serviter Bondye, parey i ganny dekrir dan Labib. Par egzanp, zapot Pol ti vreman anvi vin efikas pour promot bann lentere Rwayonm. I paret ki i ti ekrir son premye let pour kongregasyon Kretyen an Korent pandan son dernyen lannen ki i ti pe reste an Efez. Konsernan sa ki i ti anvizaze fer aprezan, i ti ekrir: “Mon annan lide reste isi Efez ziska Lapannkot. Parski en gran laport in ouver pour mwan fer en gran travay, e i annan bokou lennmi.”—1 Kor. 16:8, 9.

Pol ti’n plàn pour vwayaz Masedwann ek Korent. Toutfwa, i ti rekonnet en loportinite pour fer en bon travay par reste ankor en pe letan an Efez. Pol ti fleksib, i ti vwar en sitiasyon favorab kot i ti pou kapab promot bann lentere Rwayonm la kot i ti ete. Alors i ti aziste byen son progranm. En gran laport ki anmenn ver aktivite ti’n ouver pour li, e Pol ti vreman anvi byen servi sa loportinite pour antre ladan.

Pour Pol fer sa i ti bezwen fer en kantite travay, e sa ti enplik pres sa bon nouvel e batir sa kongregasyon an Efez. Plitar, Pol ti dir avek bann ansyen dan sa kongregasyon: “Mon pa’n kasyet nanryen ki kapab itil pour zot, ler mon’n ansennyen an piblik ek dan zot lakaz. Mon’n fer apel avek bann Zwif konman avek non-Zwif pour sanz zot lavi pese e vin kot Bondye, e krwar dan nou Senyer Zezi-Kri.”—Akt 20:20, 21.

Dan menm fason, bokou zot, frer ek ser, zot in byen servi bann loportinite ki’n ganny prezante devan zot. Pandan sa dernyen lannen servis, en mwayenn 798,938 in kapab aranz zot lavi pour kapab partisip dan serten laspe servis pionye. Serten zot in vwayaz dan bann landrwa lwen pour servi konman misyonner. Zot pe partaz sa bon nouvel avek devouman e batir bann kongregasyon. Serten parmi zot in aprann en lot langaz pour zot kapab ed bann dimoun ki koz en lot langaz ki reste dan zot vwazinaz. I annan lezot osi ki’n aranz zot lavi pour travay dan teritwar ki pa pour okenn kongregasyon ouswa pour servi kot i annan en pli gran bezwen. Serten in dekouver ki en gran laport aktivite in ouver dan lekol, dan travay, oubyen dan lezot sitiasyon kot en temwannyaz efikas i kapab ganny donnen, tel parey par telefonn. Bann leksperyans atraver lemonn i donn levidans ki pep Bondye, zenn konman vye, i vreman anvi rod e trouv bann loportinite pour kominik konnesans laverite avek dimoun partou.

Asire ki Zeova i vwar e i apresye bokou zot bann zefor. Labib i dir: “Bondye pa enzis pour oubliy travay ki zot in fer, ni lanmour ki zot in montre pour li par servis ki zot in rann.” (Ebr. 6:10) Kontinyen vey byen bann loportinite ki permet zot promot ladorasyon pir. Serten zot i kapab agrandi zot minister. Nou tou nou kapab fer zefor pour fer nou minister pli efikas.

Nou pa akonpli nou travay predikasyon san lopozisyon. Rapel ki apre ki Pol ti’n koz lo en gran laport aktivite ki ti’n ganny ouver avek li, i ti ekrir: “I annan bokou lennmi.” Pour Pol, bann lennmi ti bann Zwif ek bann non Zwif. Serten ti atak li direkteman e lezot ti fer konplo kont li anba anba.—Akt 19:24-28; 20:18, 19.

Nou rankontre menm sitiasyon ozordi. Anmezir ki nou apros destriksyon sa sistenm mesan nou ekspekte ganny plis lopozisyon. Satan i annan “gran lakoler,” e son lakoler i sirtou kont bann ki servi Bondye. (Rev. 12:12) Pa zanmen bliye ki Satan i “sa enn ki gouvern lemonn.” Zezi ti dir avek son bann disip: “Si zot, zot ti fer parti lemonn, lemonn ti pou kontan son byen. Me parski, zot pa fer parti lemonn, parski mon’n swazir zot e mon’n retir zot dan lemonn, sanmenm rezon akoz ki i ay zot.”—Zan 14:30; 15:19.

Nou determinen pour pa les personn afebli nou lafwa pour Bondye oubyen fer nou ralanti dan nou travay predikasyon. Nou konnen ki i pou kontinyen annan bann ki pou atak nou e fer konplo kont nou. Me nou kontinyen pres bon nouvel Rwayonm kantmenm difikilte, e nou annan konfyans ki Zezi pou kraz Satan avek son latroup dan letan fikse Zeova. Bann lennmi pa ti fer Pol reste trankil; e zot pa ni menm fer bann serviter Zeova ozordi reste trankil. Malgre lakoler Satan ek laenn ki lemonn i annan, lespri Zeova pe travay parmi Son pep. Pa i en lazwa pour konnen ki lakantite dimoun ki pe proklanm sa bon nouvel in ariv en total 6,304,645!

Nou priye ki zot kontinyen byen servi loportinite pour promot bann lentere Rwayonm merveye Zeova. Nou asir zot ki nou enterese senserman avek zot anmezir ki nou debout “zepol kont zepol” pour servi Bondye Tre O, Zeova.—Tsef. 3:9.

Zot frer,

Konsey Direkter Temwen Zeova