Ki mannyer Laverite i liber nou
1 En zour, Zezi ti dir avek bann Zwif ki ti’n krwar dan li: “Zot a konn laverite e laverite i ava fer zot lib.” (Zan 8:32) I ti pe koz lo en liberte ki pli gran ki okenn liberte ki sitwayen en pei i kapab gannyen. I en liberte ki tou dimoun i kapab gannyen, ki swa ris oubyen pov, ki swa edike oubyen non. Zezi ti ansenny en laverite ki ti pou liber dimoun anba lesklavaz pese ek lanmor. Parey Zezi ti eksplike, “tou dimoun ki fer pese i lesklav pese.” (Zan 8:34) Pa nou pe vreman esper sa letan kan tou imen obeisan ‘pou ganny libere en zour avek pouvwar destrikter ki pe gard zot dan lesklavaz, pour partisip dan laliberte ek laglwar bann zanfan Bondye’!—Rom. 8:21.
2 Laverite konsernan Zezi ek son rol dan lakonplisman plan Zeova i anmenn en tel liberte. Sa laverite i enkli konnesans lo sa sakrifis ranson ki i’n donnen an nou faver. (Rom. 3:24) Menm la konmela, lo en serten degre nou ganny libere avek lafreyer, dezespwar, e avek tou sort kalite pratik danzere, ler nou aksepte e soumet avek laverite sorti dan Labib.
3 Libere avek Lafreyer ek Dezespwar: Nou pa bezwen dezespere akoz kondisyon lemonn parski nou konpran akoz mesanste i egziste e nou konnen ki byento i pou ganny retire lo later. (Ps. 37:10, 11; 2 Tim. 3:1; Rev. 12:12) Deplis, laverite i liber nou avek bann fo lansennyman konsernan kondisyon bann dimoun mor. Nou konnen ki dimoun mor pa kapab fer nou ditor, ki zot pa pe soufer dan tourman eternel, e ki Bondye pa pran dimoun lo later senpleman pour anmenn zot avek li dan lesyel.—Ekle. 9:5; Akt 24:15.
4 Sa laverite ti soutenir en papa ek en manman kan zot ti perdi zot zanfan dan en aksidan. Sa manman ti dir: “I annan en lespas vid dan nou lavi ki pa kapab ganny ranpli ziska ki nou vwar nou garson ankor par mwayen rezireksyon. Me nou konnen ki nou soufrans i zis tanporer.”
5 Libere avek bann Pratik danzere: Laverite dan Labib i kapab transform panse ek personnalite en dimoun. I liber sa dimoun avek bann problenm ki kapab ganny evite. (Efe. 4:20-24) Ler en dimoun i onnet e i travay dir sa i kapab ede pour li pa tonm dan lanmizer. (Prov. 13:4) Montre lanmour dezenterese i amelyor nou relasyon avek lezot. (Kol. 3:13, 14) Respekte lotorite Kretyen i diminyen bann difikilte dan fanmiy. (Efe. 5:33–6:1) Evit bwar an ekse, limoralite seksyel, taba, ek drog i promot en bon lasante.—Prov. 7:21-23; 23:29, 30; 2 Kor. 7:1.
6 Pour nef an en zennonm pa’n kapab arete servi drog. En zour i ti zwenn en proklanmater ki ti pe donn temwannyaz dan semen. I ti aksepte piblikasyon, e laranzman ti ganny fer pour vizit li kot son lakour. En letid Labib ti konmanse. De mwan plitar sa zonm ti aret net servi drog, e apre wit mwan letid, i ti batize. Ler son frer ek son belser ti vwar ki i ti’n aret servi drog, sa ti motiv zot pour konmans etidye Labib.
7 Ed Lezot ganny libere: Bann dimoun ki’n ganny anprizonnen par bann fo lansennyman pour en bon pe letan i kapab vwar li difisil pour konpran sa liberte ki Parol Bondye i ofer. Pour kapab tous zot leker i demann en zefor spesyal ek bon preparasyon delapar sa ansennyan. (2 Tim. 4:2, 5) La i pa letan pour nou ralanti dan nou travay “pour anons laliberte pour bann ki’n ganny anprizonnen.” (Iza. 61:1) Liberte ki en Kretyen i annan i presye. Pour ganny sa liberte i vedir lavi eternel.—1 Tim. 4:16.