Vin en Legzanp an bonn Kondwit
1. Akoz nou bezwen sirtou konsyan lafason ki nou kondwir nou dan lasanble distrik?
1 Ler nou rasanble an gran kantite dan bann lasanble distrik, lafason ki nou azir e mannyer nou tret lezot i sirtou ganny remarke par bann ki pe gete. Alors, sakenn ant nou i bezwen donn en latansyon spesyal sa konsey Labib: “Byen kontrol zot lekor. . . . dan tou keksoz, vin en legzanp an bonn kondwit.” (Tit 2:6, 7) I demann zefor ekstra pour ‘pa pran ka zis avek nou prop lentere, me osi avek lentere lezot.’ (Fili. 2:4) Annou konsider serten laspe kot nou kapab aplik sa konsey dan nou lasanble distrik ki pe aprose “Donn Bondye Laglwar.”
2. Ki nou devret gard antet ler nou pe rod en lasanm lotel?
2 Fer Laranzman pour Lansanm Lotel: Nou ganny en bon loportinite pour demontre en bon kondwit ler nou pe fer laranzman pour ganny en lansanm lotel. Silvouple rezerv zis sa lasanm ki ou’n plàn pour servi dan lotel. Fer sir ki ou byen pey ou depozit davans. Si omoman ki ou pe anrezistre ou larive ek ou depar i annan bokou dimoun, lezot pou byen apresye si ou demontre fri lespri Bondye. (Gal. 5:22, 23) Par egzanp, i kapab pa posib pour tou dimoun ganny en lasanm pour bann dimoun ki pa fimen, menm si ou ti’n demann enn ler ou ti fer ou rezervasyon.
3. Ki mannyer nou kapab “fer dibyen tou dimoun” dan lotel?
3 Nou lentere personnel dan lezot i devret ganny vwar dan lafason ki nou servi gadyak ki lotel i donn gratwitman. I pa apropriye pour anmenn manze ki lotel in fourni pour son bann envite kot lasanble. Travayer lotel i byen apresye ler nou byen swiv lareg lotel e montre konsiderasyon pour staf par kit en pti larzan pour zot dan lasanm. Dan sa bann fason nou “fer dibyen tou dimoun” e donn en bon temwannyaz lezot.—Gal. 6:10.
4, 5. Konman bann zanfan i kapab loue Zeova, e ki responsabilite paran i annan?
4 Paran ek Zanfan: Dan en lemonn kot en kantite zanfan napa bon konportman, nou zanfan i ganny rekonnet konman diferan, e sa i glorifye Zeova ek son lorganizasyon. Sepandan, parler, problenm in arive akoz zanfan pa’n ganny byen sirveye. (Prov. 29:15) Paran pa devret les zot zanfan san sirveyans dan lotel, enkli kot basen naze, oubyen dan landrwa lasanble.
5 Avan lasanble, serten paran in vwar li itil pour reviz avek zot zanfan sa kalite konportman ki ekspekte avek zot. (Efe. 6:4) Zot ed zot zanfan pour konpran ki vre lanmour Kretyen “pa arogan” oubyen “rod son prop lentere.” (1 Kor. 13:5) Lasanble distrik i en letan ki’n ganny met dekote pour ganny ansennyen par Zeova, e zanfan ensi ki adilt i kapab montre respe pour sa laranzman par zot kondwit dan landrwa lasanble ek dan lezot landrwa.—Iza. 54:13.
6. Ki lefe nou bon kondwit i kapab annan lo lezot?
6 Nou bon kondwit i kapab fer en kantite pour koriz bann fo konsep e atir dimoun ver vre ladorasyon. (Mat. 5:16; 1 Pyer 2:12) Fotespere ki tou dimoun ki nou zwenn dan nou lasanble distrik i resevwar en bon temwannyaz par lafason ki nou azir e mannyer nou tret zot. Dan sa fason nou pou “vin en legzanp an bonn kondwit” e glorifye Zeova.—Tit 2:7.
[Bwat lo paz 4]
Annan konsiderasyon pour Lezot
▪ Rezerv zis sa lasanm ki ou’n plàn pour servi
▪ Annan pasyans letan ou pe anrezistre ou larive ek ou depar
▪ Pa abiz lo laranzman gadyak
▪ Sirvey byen ou zanfan
▪ Kit en pti larzan