Revizyon Pour Lekol Minister Teokratik
Sa bann kestyon swivan pou ganny egzaminen oralman dan Lekol Minister Teokratik pandan semenn le 30 Zen, 2003. Sirveyan lekol pou kondwir en revizyon 30 minit baze lo lenformasyon ki’n ganny trete dan bann ekspoze depi semenn le 5 Me ziska le 30 Zen, 2003. [Not: Kot napa referans apre kestyon, ou pou bezwen fer ou prop resers pour trouv larepons.—Vwar liv Lekol Minister, p. 36-7.]
PWEN LANSENNYMAN
1. Akoz varyasyon dan lavwa i enportan kan pe prezant en ekspoze, e konman sa i kapab ganny fer? [be p. 111 bwat; p. 112 bwat] Varyasyon apropriye dan lavwa i fer en ekspoze vivan, stimil lemosyon e motiv lezot pour azir. Si napa varyasyon dan lavwa sa i kapab donn lenpresyon ki sa orater napa en vre lentere dan son size. Varyasyon apropriye dan lavwa i ganny fer atraver en sanzman dan volim, vites ek ton lavwa.
2. Akoz ki en orater i kapab mank lantouzyasm, menm si i krwar dan sa ki i pe dir e i kontan Zeova? [be p. 115 par. 3-4; p. 116 par. 1] En orater i kapab mank lantouzyasm si i’n zis prepar sa ki i pe al dir me pa’n prepar son leker par emosyonnelman enplik li dan son size e totalman absorbe dan son size. (Ezra 7:10) En orater i bezwen osi annan sa konviksyon ki son lodyans i bezwen antann sa ki i annan pour dir.
3. Kwa ki pou ed en orater koz avek santiman ek lasaler dan en ekspoze, e akoz sa i enportan? [be p. 119 par. 1-4] Koz avek santiman ek lasaler i kapab ganny demontre kan sa orater i annan sa dezir pour ed lodyans. Son ton lavwa ek son lekspresyon figir i kapab transmet lasaler ek santiman, ki esansyel si i anvi tous leker bann ki pe ekout li.
4. Kwa ki determinen ki kantite lantouzyasm, lasaler, ek lezot lemosyon ki ou bezwen transmet dan en ekspoze? [be p. 120 par. 1-4] Sa i depan bokou lo sa lenformasyon ki pe ganny diskite. Eski i en kondannasyon dir oubyen en siplikasyon ranpli avek konpasyon? Sa orater pa devret mazin zis bann mo ek lide me osi santiman ki devret akonpanny sa bann parol. (Vwar Matye 23 ek Zenez 44.)
5. Vre oubyen Fo: Zes ek lekspresyon lo figir i annan valer selman si ou lodyans pe get ou. Eksplike. [be p. 121 par. 3] Fo. Menm kan ou lodyans pa kapab vwar ou, si ou fer bann zes ek lekspresyon figir apropriye, ou lavwa pou pli fasilman transmet lenportans ou mesaz osi byen ou santiman personnel konsernan sa ki ou pe dir.
EKSPOZE NO. 1
6. Kwa ki ti ed Yosiya swazir sa bon semen malgre i ti annan en lanfans terib? (2 Kron. 34:1, 2) [w01 15/4 p. 27 par. 1-6; p. 28 par. 4 (Angle/Franse)] Lenfliyans pozitif latitid repantans son granpapa Manase; antann “parol lalwa”; en latitid limilite; profon respe pour bann profet Zeova ek zot bann mesaz; en determinasyon ferm pour fer lavolonte Bondye. (2 Kron. 33:10-13; 34:19-33)
7. Ki sinifikasyon Proverb 9:7, 8a, e konman sa i kapab ganny aplike dan predikasyon? [w01 15/5 p. 29 par. 4-5 (Angle/Franse)] I pa byen pour ansenny laverite dan Parol Bondye avek en dimoun ki ridikil oubyen ki pa kontan sa laverite e ki an konsekans demontre mepri pour sa ansennyan. Dan predikasyon nou bezwen fer zefor pour tous leker bann ki senser avek sa bon nouvel Rwayonm e pa enplike dan bann deba ek largiman avek bann ki sikann nou.
8. Ki Zeova ti oule dir kan i ti dir bann Izraelit, ‘Ou pa devret oubliye,’ e konman nou kapab evite oubliye? (Det. 4:9; 8:11) [be p. 20 par. 1-3] Bann Izraelit pa ti merit vin sitan okipe dan zot bann zafer personnel ki zot pa arive rapel tou sa ki Zeova ti fer pour zot dan en fason enportan. Etidye e lir Labib regilyerman e partisip aktivman dan bann renyon kongregasyon e dan predikasyon i kapab ede pour annan sa lasirans ki Zeova i annan en lefe profon lo nou lavi toulezour.
9. Konman parol senser David dan Psonm 32:1, 5 e dan Psonm 51:10, 15 i montre ki en dimoun pa devret santi ki i pa vo nanryen apre ki i’n komet en pese grav me i’n montre vre repantans? [w01 1/6 p. 30 par. 1-3 (Angle/Franse)] David ti santi en soulazman letan i ti’n fini konfes son pese, aksepte responsabilite total pour son bann aksyon e pa zistifye son lekor devan Zeova oubyen esey blanm lezot. I ti eksprim en determinasyon pour kontinyen dan son servis pour Bondye e avek led Zeova, pour pirifye son leker e fer en nouvo depar.
10. Ki nou kapab aprann avek bann lenstriksyon Pol ki ganny rikorde dan 1 Timote 5:3-16 konsernan pran swen avek bann ki dan bezwen? [w01 15/6 p. 11 par. 1 (Angle/Franse)] Kongregasyon i devret konsernen avek bann vev ki dan bezwen; si zot kapab, fanmiy bann ki dan bezwen, i bezwen pran sa responsabilite pour asiste zot; bann vev i devret ranpli serten kondisyon pour kalifye pour ganny lasistans.
LEKTIR LABIB LASEMENN
11. Avek ki Zezi ti pe fer referans ler i ti servi sa lekspresyon “ne de nouvo,” parey i’n ganny rikorde dan Zan 3:3? [w95 1/7 p. 9-10 par. 4-5] Zezi ti pe refer avek ne par lespri sen. Par sa nesans inik, bann zonm ek fanm enparfe i antre dan en relasyon spesyal avek Zeova Bondye, e vin son bann zanfan adoptif avek sa lespwar pour en leritaz seles dan lavenir.
12. Dan ki fason Zezi ti servi son ledikasyon, e ki leson enportan nou kapab aprann avek sa? (Zan 7:15-18) [w96 1/2 p. 9-10 par. 4-7] Zezi ti ganny son ledikasyon avek Bondye, e i ti servi li pour glorifye Zeova, me pa son lekor. Sa i ansenny nou ki ledikasyon i devret ganny servi, pa pour glorifye nou menm, me pour loue Zeova.
13. Akoz Zan 7:53–8:11 pa ganny enkli dan teks prensipal Traduction du monde nouveau? Sa pasaz in ganny retire dan laplipar bann versyon ansyen. I evidan ki sa bann verse pa form parti avek Levanzil Zan. Zot pa otantik e zot pa’n ganny enspire. [3, it-2-E p. 94 par. 5; it-1-F p. 1246 par. 5]
14. Konman ki Zezi ti “retournen dan menm mannyer” ki i ti mont osyel? (Akt 1:11) [w90 1/6 p. 11 par. 5] Zis disip Zezi ki ti vwar li ale. Pareyman, zis bann Temwen Zeova ki ti rekonnet son retour ek prezans envizib, ki ti konmans an 1914.
15. Akoz ki “personn parmi lezot, pa ti oze zwenn avek [bann disip],” parey Akt 5:13 i dir? Vi ki lipokrizi ek malonnekte Ananyas ek Safira ti ganny devwale e zot ti ganny egzekite, sa ti servi konman en legzanp lavertisman tre pwisan. Apre sa, okenn dimoun avek move lentansyon pa ti annan sa kouraz pour zwenn bann disip. [7, w90 1/6 p. 14 par. 22-3]