Annan Dezabilite—Me prodiktif
1 Si ou parmi sa kantite Temwen Zeova ki annan en dezabilite, ou ankor kapab montre ou prodiktif dan predikasyon. Anfet, ou sitiasyon i kapab ofer ou bann loportinite spesyal pour donn en temwannyaz e ankouraz lezot.
2 Loportinite pour Donn en Temwannyaz: Bokou Kretyen ki bezwen lite avek en dezabilite pe partisip plennman dan predikasyon. Par egzanp, i annan en ser ki son abilite pour marse e koze ti ganny bokou afekte par en loperasyon. I ti trouve ki i ti pou kapab partisip dan aktivite magazin si son msye ti park zot loto pre avek en trotwar kot bokou dimoun i pase. En fwa, i ti donn 80 magazin dan zis de er-d-tan! Ou sitiasyon spesyal i kapab osi fer ou ganny kontak avek bann dimoun ki pa fasil pour zwenn. Si sa i leka, vwar zot konman ou teritwar spesyal.
3 Ou predikasyon i kapab byen efikas! Lezot i kapab ganny atire ver mesaz Rwayonm letan zot obzerv ou determinasyon e sa bon lefe ki laverite Labib in fer lo ou lavi. Deplis, ler ou rankontre dimoun ki dan difikilte, ou leksperyans ki ou’n gannyen i kapab ekip ou pour donn zot rekonfor ki sorti dan Parol Bondye.—2 Kor. 1:4.
4 Ankouraz Lezot: Eski pa ou’n ganny ankouraze avek leksperyans Laurel Nisbet, ki ti oblize reste dan en masin an fer pour 37 an me ki ti ed 17 dimoun pour ganny konnesans egzakt laverite Labib? Dan menm fason, ou legzanp i kapab motiv lezot Kretyen pour fer zefor dan servis Zeova.—g93 22/1 paz 18-21.
5 Menm si ou sitiasyon i anpes ou al dan predikasyon kantite ki ou ti a anvi, ou kapab kantmenm sa ankouraz lezot. En frer ti dir: “Mon’n vwar ki menm en dimoun ki annan en dezabilite grav i kapab ed lezot. Mwan ek mon madanm nou’n vin en gran sipor pour plizyer dimoun dan kongregasyon. Akoz nou sitiasyon, nou toultan la, toultan disponib.” Me akoz ou dezabilite, i akseptab ki ou pa toultan kapab fer dapre sa ki ou santi ou kapab fer. Toudmenm, avek led lezot ou kapab partisip aktivman dan predikasyon. Pour sa rezon, si ou bezwen serten led, pa ezite dir avek bann ansyen ouswa lezot dimoun dan kongregasyon ki kapab asiste ou.
6 Zeova i vwar tou sa ki ou fer pour servi li, e i pran plezir dan ou servis ki ou fer avek tou ou leker. (Ps. 139:1-4) Osi lontan ki ou depan lo li, i pou donn ou lafors pour annan en minister ki prodiktif e ki annan valer.—2 Kor. 12:7-10.