Rekonesans pour Mizerikord Bondye
1 Avan ki zapot Pol ti vin en Kretyen, i ti opoz severman larelizyon Kretyen ki ti pe propaze. Me vi ki i ti fer sa dan linyorans, i ti ganny demontre mizerikord. Zeova ti demontre labonte anver Pol par donn li sa travay pour prese. I ti seri sa travay ki Bondye ti donn li. (Akt 26:9-18; 1 Tim. 1:12-14) Rekonesans pour mizerikord Bondye ti pous Pol pour fer tou sa ki i kapab pour akonpli son minister.—2 Kor. 12:15.
2 Gras a mizerikord Bondye, nou osi nou’n resevwar en minister. (2 Kor. 4:1) Parey Pol, nou kapab demontre nou rekonesans pour mizerikord ki’n ganny demontre anver nou, par fer zefor pour ed lezot progrese spirityelman. En fason ki nou kapab fer sa se par kondwir bann letid Labib.
3 Konmans bann Letid Labib: En fason pour konmans Letid Labib se par ofer pour anmenn magazin tou le mwan. Ler nou vizit bann dimoun ki nou ofer magazin regilyerman, nou arive konn pli byen kwa ki enteres zot. Avek letan, en lartik dan enn bann magazin i kapab servi konman en loportinite pour nou entrodwir en letid Labib dan brosir Ekspekte. Dan bann lezot vizit ki nou fer apre sa, diskisyon i kapab kontinyen dan brosir Ekspekte ler nou retournen pour anmenn magazin pour sa met lakour.
4 Lapriyer ek Zefor i neseser: Lapriyer ansanm avek bokou zefor, pou amelyor nou aktivite predikasyon. En ser pionye ki ti annan en letid Labib ti priy Zeova pour ed li ganny plis letid. I ti osi azir an armoni avek son lapriyer. I ti egzamin son aktivite predikasyon e i ti remarke ki i pa ti pe ofer bann dimoun en letid Labib ler i fer retourn vizit. I ti konmans fer li e deswit i ti ganny ankor de letid.
5 Pa nou privilezye “pour anons Levanzil lagras Bondye”! (Akt 20:24) Fotespere ki rekonesans pour mizerikord Bondye i pous nou pour fer tou nou zefor pour ed lezot benefisye avek faver ki Zeova i demontre par son labonte.