Zot devret ranpli avek Limilite
1 En zenn berze i met son konfyans dan Zeova e i defet en gerye pwisan. (1 Sam. 17:45-47) En zonm ris i andir difikilte avek pasyans. (Zob 1:20-22; 2:9, 10) Garson Bondye i donn son Papa tou loner ki i resevwar pour son lansennyman. (Zan 7:15-18; 8:28) Dan sak sa bann legzanp, limilite i zwe en rol tre enportan. Pareyman ozordi, limilite i esansyel dan tou sitiasyon ki nou rankontre.—Kol. 3:12.
2 Dan Predikasyon: Etan bann minis Kretyen, avek limilite nou partaz sa bon nouvel avek tou sort kalite dimoun. Nou pa kondann zot akoz zot ras, kiltir, ouswa lorizin. (1 Kor. 9:22, 23) Si serten i maltret nou oubyen rezet mesaz Rwayonm, nou pa reponn dan menm fason me avek pasyans nou kontinyen rod bann ki pare pour resevwar sa mesaz. (Mat. 10:11, 14) Olye esey enpresyonn lezot avek nou konnesans ouswa ledikasyon, nou diriz latansyon ver Parol Bondye, par rekonnet ki i pli konvenkan ki okenn keksoz ki nou kapab dir. (1 Kor. 2:1-5; Ebr. 4:12) Parey Zezi, nou donn tou louanz Zeova.—Mark 10:17, 18.
3 Dan Kongregasyon: Bann Kretyen i osi devret “montre bokou limilite dan zot relasyon avek kanmarad.” (1 Pyer 5:5) Si nou konsider lezot konman pli siperyer ki nou, nou pou rod fason pour servi nou bann frer ek ser olye ekspekte zot servi nou. (Zan 13:12-17; Fili. 2:3, 4) Nou pa pou santi ki nou tro enportan pour nou partisip dan netwayaz Lasal Rwayonm.
4 Limilite i ede pour “avek lanmour siport kanmarad” e sa i promot lape ek linite dan kongregasyon. (Efe. 4:1-3) I ed nou pour soumet avek bann ki’n ganny apwente pour dirize. (Ebr. 13:17) I motiv nou pour aksepte nenport konsey ouswa disiplin ki nou gannyen. (Ps. 141:5) Limilite i osi pous nou pour depan lo Zeova pour akonpli tou privilez ki nou kapab resevwar dan kongregasyon. (1 Pyer 4:11) Parey David, nou rekonnet ki sikse pa depan lo abilite imen me lo benediksyon ki sorti kot Bondye.—1 Sam. 17:37.
5 Devan nou Bondye: Pli enportan ki tou, nou bezwen ‘avek limilite plas nou anba kontrol pisans Bondye.’ (1 Pyer 5:6) Si nou bezwen lalit avek bann sitiasyon tre difisil, petet nou pe esper avek enpasyans sa soulazman ki Rwayonm pou anmennen. Me avek limilite nou demontre pasyans, par esper Zeova pour akonpli son bann promes dan son letan fikse. (Zak 5:7-11) Parey ti leka avek Zob, sa zonm fidel, keksoz ki pli enteres nou se ki “non Zeova i kontinyen ganny beni.”—Zob 1:21.
6 Profet Danyel ti ‘abes li devan son Bondye’ e i ti ganny beni avek faver Zeova ek bokou bon privilez. (Dan. 10:11, 12) Pareyman, nou osi, nou devret ranpli avek limilite, vi ki nou konnen ki “rezilta limilite ek lakrent pour Zeova i larises ek laglwar e osi lavi.”—Prov. 22:4.