Pres avek ou Zanfan i en bon Led pour fer zot vin Disip
1 Nou tou nou konn tre byen ki nou bann zenn i bezwen reziste presyon sa lemonn mesan ki nou pe viv ladan. Akoz nou kontan zot, nou anvi ed zot pour zot kapab fer fas avek sa bann presyon. Predikasyon i kontribye en kantite pour batir, fortifye e fer lafwa bann ki partisip ladan regilyerman vin pli solid. Deplis, i en proteksyon. I osi permet bann zenn Kretyen pour pa zis la dan kongregasyon, me pour vin bann manm aktif, ki enterese avek progre kongregasyon. Paran, ansyen, ek asistan ministeryel, eski ou rekonnet rol ki bann zenn ek bann zanfan i kapab zwe dan kongregasyon konman bann proklanmater e led ki ou kapab donn zot dan sa domenn?
2 Rol enportan bann Paran: Depi ki zot ankor byen zenn, ed ou zanfan pour etablir bann lobzektif spirityel. Par egzanp, servi konman pionye ordiner ouswa dan Betel. Ankouraz zot pour fer pionye asistan pandan zot vakans. Plizyer paran i kontan akoz zot annan enn oubyen plizyer zanfan dan serten laspe minister aplentan. Bann paran i byen fer ler zot ankouraz zot zanfan pour swiv konsey Zezi kot i ti dir fodre met bann lentere Rwayonm premye plas dan nou lavi.—Mat. 6:33.
3 Bann parol ki pa ganny swiv par aksyon napa en lefe dirab dan lespri bann zanfan. Parski bann zanfan i imit sa ki zot paran i fer. Si ou anvi ankouraz zot pour met bann lentere Rwayonm dan premye plas, e si ou anvi ki ou zanfan i devlop sa dezir pour azir dan sa fason, ou devret donn zot legzanp. Si zot anvi etablir servis pionye konman lobzektif pour zot zanfan, bann paran i devret montre ki predikasyon i vreman enportan. Zot bezwen partisip ladan otan ki posib e fer pionye asistan detanzaot. Nou pa kapab annan de fason koze, ni de fason kondwir nou, setadir enn ki apropriye kot Lasal Rwayonm, e enn kot lakour.
4 Ou latitid pou enfliyans en kantite ou zanfan. En zenn ki annan 21 an i dir: “Mon paran in toultan montre ki pour zot, servis pionye i pli bon keksoz pour fer dan lavi.” En lot zenn i eksplike: “Nou paran in toultan ankouraz nou pour met servis pionye konman en lobzektif.”
5 Eski ou konnen ki enn parmi bann pli bon fason pour fer sir ki ou zanfan i progrese spirityelman se pour anmenn zot dan predikasyon? Sa pou donn ou en bon loportinite pour koz avek zot. Ou pou kapab ekout zot pe koz avek bann dimoun e pe reponn zot kestyon. Ou pou kapab osi pli byen konnen ziska ki degre zot konpran e apresye laverite.
6 Konsernan predikasyon, i kapab ki ou zanfan i konsider sa servis en pe parey Zeremi, ki ti dir: “O Souvren Senyer Zeova! La mon vreman pa konnen konman pour koze, akoz mon ankor tro zenn.” Alor, i tre enportan pour form zot gradyelman.—Zer. 1:6, 7.
7 Bann Sizesyon pratik pour bann ki pli Zenn: Okonmansman, bann pti zanfan i kapab senpleman ofer bann fey lenvitasyon oubyen bann trak. Anmezir ki ou edik zot, zot kapab aprann konman pour ofer magazin, pour fer bann prezantasyon bref baze lo Labib oubyen pour fer en prezantasyon pli long ki zot kapab. Finalman, zot pou kapab kondwir en letid Labib. Ki mannyer ou kapab met sa bann sizesyon an pratik? Port byen latansyon lo sa de demonstrasyon swivan, baze lo Nou Minister Rwayonm Zanvye 1979, paz 4, par. 4 ek 5 an Franse e paz 8 an Angle.
8 Eski ou pe form ou zanfan dan predikasyon? Ler ou zanfan (ouswa lezot zanfan) i akonpanny ou dan predikasyon, eski ou fer zot partisipe? Nou ankouraz zot pour fer sa, akoz bann zanfan osi zot devret ‘fer deklarasyon piblik zot lafwa pour delivrans.’ (Rom. 10:10) I pou gou si plitar zot kapab dir parey sa psalmis: “O Bondye, ou’n ansenny mwan depi mon zenes, e ziska prezan mon kontinyen koz lo ou travay merveye.” (Ps. 71:17) Pa i en plezir kan bann paran i vwar zot zanfan aksepte sa formasyon! Bann zanfan zot, zot pou demontre ki deplizanpli zot lafwa pe vin pli for. Eski i annan lezot keksoz ki kapab anmenn plis lazwa pour bann paran?
9 Bann paran i konnen ki bann bon labitid ki zot pe donn bann zenn ek bann zanfan ozordi pou kontribye pour fer zot vin bann adilt responsab. Par ed zot pour regilye dan predikasyon, pou fer zot vin bann Kretyen matir ki pou viv en lavi ki pou anmenn louanz pour non Zeova. Si ou anvi konn ou zanfan pli byen, konn osi zot panse ek zot santiman, e pour fer zot vin bann disip ki kontan Zeova, alors rod letan pour sorti avek zot dan predikasyon. Ou pou vwar ki sa i vreman vo lapenn!