Konman nou kapab ed bann Msye ouswa Madanm marye ki pa Temwen?
1 Bokou serviter Zeova in marye avek bann dimoun ki tre amikal avek bann Temwen. Zot enterese avek kongregasyon me zot ezite pour vin bann serviter Bondye. En mari ti admet: “Sa lide pour al port an port ti en gro lobstak pour mwan.” Lezot i kapab annan bann labitid ki kontrer avek Labib ki zot bezwen sirmonte. Ouswa zot kapab santi ki zot pa pou arive desarz tou sa bann aktivite spirityel ki zot msye ouswa madanm pe fer. Ki mannyer nou kapab ed zot?
2 Montre Lentere personnel: Ler nou annan lentere personnel dan lezot e nou remark bann keksoz ki pe trakas zot, sa i kapab ed zot reazir byen anver laverite Labib. (Fili. 2:4) Bann ki avan pa ti partaz lafwa zot msye ouswa madanm in souvan mansyonn lentere senser ki lezot ti demontre anver zot. Sa mari ki’n ganny mansyonnen pli boner ti eksplike: “José, ki en ansyen dan kongregasyon, ti vreman enterese avek mwan. Mon krwar ki se gras a son lankourazman ki mon ti konmans etidye seryezman.” En lot mari i rapel ki ler bann frer ti vizit li, zot ti koz lo bann keksoz ki ti enteres li. I ti dir: “Mon ti konmans vwar lafwa [mon madanm] dan en lot fason. Son bann zanmi ti bann dimoun tre entelizan ki ti kapab koz lo plizyer kalite size.”—1 Kor. 9:20-23.
3 Donn zot Led pratik: Bann msye ouswa madanm marye ki pa Temwen i osi kapab enpresyonnen par bann bon led ki zot gannyen. (Prov. 3:27; Gal. 6:10) Ler loto en mari ki pa Temwen ti aret marse, en zenn frer ti ed li. I rapel: “Sa ti vreman enpresyonn mwan.” En lot frer ti pas en lazournen pour ed mari en ser fer en baraz lo son propriyete. Pandan ki zot ti pe travay e koz ansanm, zot ti vin zanmi. De semenn plitar, sa zonm ti apros sa frer e dir: “In ariv ler pour mwan fer serten sanzman dan mon lavi. Eski ou ti ava kontan fer en letid Labib avek mwan?” I ti progres vitman e prezan i en Temwen batize.
4 Anmezir ki nou kontinyen rod bann ki pare pour resevwar nou mesaz dan nou teritwar, annou kontinyen ed bann ki’n marye avek nou bann konpanyon Kretyen.—1 Tim. 2:1-4.