Fer byen atansyon mannyer ou servi ou Letan
1. Ki difikilte bokou dimoun i rankontre ozordi?
1 Dan sa lepok ki nou pe viv ladan, i annan en kantite lekipman ki redwir letan ek travay. Bokou dimoun i vwar zot avek en kantite keksoz pour fer e en pti gin letan pour fer zot. Eski ou vwar li difisil pour ou gard en bon progranm spirityel lo en baz regilye? Eski ou swete ki ou ti ava annan plis letan pour predikasyon? Ki mannyer nou kapab pli byen servi nou letan?—Ps. 90:12; Fili. 1:9-11.
2, 3. Ki problenm ki devlopman teknolozi dan domenn lenformasyon i anmennen, e konman sakenn ant nou i kapab egzamin nou lekor?
2 Idantifye bann Keksoz ki gaspiy nou Letan: Nou tou nou devret detanzaot egzamin lafason ki nou servi nou letan. Labib i ankouraz nou: “Fer byen atansyon ki mannyer zot viv. Pa viv konman bann dimoun inyoran, me konman bann dimoun saz. Servi byen tou bann lokazyon ki prezant devan zot, parski sa letan ki nou pe viv ladan i move.” (Efe. 5:15, 16) Konsider bann problenm ki devlopman teknolozi dan domenn lenformasyon in anmennen. Menm si bann konpiter ek lezot lekipman elektronik i annan bann bon litilite, zot kapab vin en pyez si nou pa fer byen atansyon mannyer nou servi nou letan.—1 Kor. 7:29, 31.
3 Sakenn ant nou i devret demann nou lekor: ‘Eski mon pas mon letan sak zour pour lir ouswa reponn bann mesaz E-mail ki zis fatigan? Eski mon souvannfwa fer bann kou-d-telefonn ouswa anvoy bann mesaz elektronik konsernan bann keksoz ki pa enportan? (1 Tim. 5:13) Eski mon al lo Internet ouswa get televizyon san okenn rezon valab oubyen bi? Eski bann zwe elektronik in konmans pran mon letan ki mon ti devret pe servi pour etidye Parol Bondye?’ Si nou angaz tro bokou nou letan pour fer sa bann keksoz, nou spirityalite i kapab ganny afekte.—Prov. 12:11.
4. Ki sanzman ki en zenn ti fer, e akoz?
4 Byen servi nou Letan: Bann lekipman elektronik i tant pour kapte nou letan ek nou latansyon. En zenn ki ti zwe en kantite bann zwe konpiter ti admet: “Parfwa ler mon ti’n zwe avan ki mon al prese ouswa al renyon, i ti difisil pour mwan konsantre. Mon ti toultan pe mazinen konman mon pou zwe sa zwe pli byen ler mon retourn kot lakour. Mon letid personnel ek lektir Labib ti ganny afekte. Mon ti konmans perdi mon lazwa pour servi Bondye.” I ti rekonnet ki i ti bezwen fer bann sanzman, e i ti efas tou bann zwe lo son konpiter. I rapel: “Sa ti vreman difisil. Avan sa mon pa ti’n realize ki kantite mon ti’n atase avek sa bann zwe. Me mon’n osi santi en gran laviktwar akoz mon ti konnen ki mon’n fer dibyen mon prop lekor.”—Mat. 5:29, 30.
5. Konman nou kapab rod letan pour fer bann aktivite spirityel, e konman nou benefisye ler nou fer sa?
5 I kapab neseser pour ou pran bann tel mezir si i annan domenn kot ou bezwen fer sanzman. Eski ou kapab pran en demi er-d-tan sak zour lo bann aktivite ki pa enportan? Sa i lakantite letan ki ou pou bezwen sak zour pour lir Labib antye dan enn an. Sa pou vreman satisfezan spirityelman! (Ps. 19:7-11; 119:97-100) Met en serten kantite letan dekote pour lir Labib, prepar renyon, e pour predikasyon. (1 Kor. 15:58) Par fer sa i pou ed ou gard bann keksoz ki gaspiy letan anba kontrol e i pou ed ou ‘konpran konman Senyer i oule ou azir.’—Efe. 5:17.