Vin sen dan tou sa ki ou fer
1. Akoz i enportan pour vin sen dan tou sa ki nou fer?
1 Konman bann serviter sa Bondye sen, Zeova, nou esey vin sen dan tou sa ki nou fer. (1 Pyer 1:15, 16) Sa i vedir ki nou esey siport e mentenir bann standar Zeova dan tou laspe nou lavi. Lasanble distrik sa lannen pou donn nou en loportinite spesyal pour demontre ki nou sen par sa ki nou fer.
2. Ki mannyer nou kapab demontre konsiderasyon pour lezot ler nou pe manze dan restoran?
2 Dan Restoran: En server dan en restoran pre avek lasanble ti dir: “Bann Temwen i diferan. Zot demontre respe pour lezot.” Annan bon kondwit i enkli evite koz for e riy for ki kapab deranz lezot ki pe manze. Nou devret osi rapel ki dan plizyer landrwa i en koutim pour kit en pti larzan, depandan lo kalite servis. Menm ler nou pe manze e bwar, nou fer tou keksoz pour laglwar Bondye.—1 Kor. 10:31.
3. Ki bon kondwit i enkli dan landrwa lasanble?
3 Dan Lasanble: Nou bon kondwit i devret sirtou evidan dan landrwa lasanble. Silvouple korpere avek gidans bann manm servis lakey dan parking e osi dan lasal. (Ebr. 13:17) Bann fanmiy i devret asiz ansanm olye ki les zot zanfan, enkli bann adolesan, asiz avek bann group lezot zenn. Okenn keksoz ki servi pour rikorde pa devret ganny konnekte avek sistenm son ek elektrik dan sa landrwa. Zot kapab ganny servi selman dan en fason ki pa pou deranz lezot. Si ou anvi tir portre, ou pa devret servi flas pandan bann sesyon. Bann telefonn mobil i devret ganny regle pour pa deranz lezot. Si en aksidan i arive dan sa landrwa, olye telefonn 999, silvouple enform en manm servis lakey ouswa Departman Premye Swen. Lasistans medikal kalifye i disponib kot lasanble.
4. Konman nou kondwit dan bann lasanble i donn Bondye laglwar?
4 Nou kondwit i disteng nou avek lezot e i rann Bondye laglwar. (1 Pyer 2:12) Dan sa lasanble distrik, aksyon bann Temwen Zeova pou ganny vwar piblikman. Pour sa rezon, determinen pour vin sen dan tou sa ki ou fer.
[Bwat lo paz 5]
Demontre en Kondwit sen
◼ Obzerv tou lareg lotel
◼ Vey byen bann zanfan
◼ Annan konsiderasyon pour lezot