Revizyon Pour Lekol Minister Teokratik
Sa bann kestyon swivan pou ganny egzaminen oralman dan Lekol Minister Teokratik pandan semenn le 28 Zen, 2004. Sirveyan lekol pou kondwir en revizyon 30 minit baze lo lenformasyon ki’n ganny trete dan bann ekspoze depi semenn le 3 Me ziska le 28 Zen, 2004. [Not: Kot napa referans apre kestyon, ou pou bezwen fer ou prop resers pour trouv larepons.—Vwar liv Lekol Minister, p. 36-7.]
PWEN LANSENNYMAN
1. Ki fakter ki kapab fer nou pa koz parey nou abitye toulezour ouswa koz dan en fason tro formel lo lestrad? [be p. 179 par. 4] Vi ki bann mo an ekrir i souvan diferan avek bann mo ki ganny servi dan konversasyon, si nou repet bann lekspresyon egzakteman parey zot ete lo papye ouswa lir direkteman lo en plan an ekrir pandan en diskour, nou fason koze pa pou parey ler nou koze toulezour. Bann fraz konplike i kapab osi fer en diskour paret pa natirel. Nou kapab mentenir en stil koze parey nou fer toulezour si nou eksprim bann panse dan nou prop mo.
2. Akoz amelyor kalite nou lavwa i pa zis annan pour fer avek respir byen e relaks bann misk? [be p. 181 par. 2] En bon kalite lavwa i osi kapab enplik nou personnalite. Ler nou vreman konsernen pour lezot, nou lavwa i demontre sa.
3. Ler nou pe partaz laverite dan Labib avek lezot, ki bann pa nou kapab pran pour ‘fer nou vin tou avek tou dimoun’? (1 Kor. 9:20-23) [be p. 186 par. 2-4] Esey vin en dimoun ki obzerv byen. Ler nou byen obzerve nou kapab aprann bann keksoz ki kapab ed nou demontre lentere senser. Petet nou kapab konnen ki travay sa met lakour i fer. Petet i annan bann dekorasyon ouswa slogan ki donn levidans son bann krwayans relizye. Par partaz lenformasyon spesifik lo Labib ki fer sans pour bann dimoun dan nou teritwar, i osi montre ki nou enterese avek sa ki zot pe panse e avek zot byennet.
4. Kwa ki enplike ler nou ekout atantivman dan predikasyon? [be p. 187] (1) Ankouraz lezot pour eksprim zot lekor, apre aret koze e donn zot sifizaman letan pour reponn. (2) Vreman ekoute ler zot koze. (3) Remersi zot pour eksprim zot pwennvi. (4) Demann bann kestyon avek swen pour kapab konpran zot panse pli byen. (5) Byen prepare pour ki nou mesaz i kler dan nou lespri, ki pou ed nou pour relaks e port en pli gran latansyon.
5. Eski i enportan pour demontre respe pour tou dimoun ki nou zwenn dan predikasyon? [be p. 190] Tou dimoun ki nou rankontre in “ganny kree dan resanblans Bondye.” (Zak 3:9) Zezi in mor pour sak dimoun e zot merit antann sa bon nouvel pour zot kapab azir e ganny sove.
EKSPOZE NO. 1
6. Ki lobzektif bann dimoun ki ansenny Parol Bondye, e kwa ki pou ed nou atenn sa lobzektif? (Mat. 5:16; Zan 7:16-18) [be p. 56 par. 3–p. 57 par. 2] Nou lobzektif pour ansenny lezot se pour onor Zeova. I devret vin nou lobzektif pour evit okenn keksoz ki kapab diminyen sa lobzektif. Alor ler nou pe deside ki nou pou dir oubyen konman nou pou dir li, i byen ki nou demann nou lekor, ‘Eski sa pou ogmant lapresyasyon pour Zeova, oubyen i pou atrakte latansyon lo mwan?’
7. Akoz i itil pour fer konparezon ler pe ansennyen, e konman Zezi ti servi sa metod pour ansenny lezot? [be p. 57 par. 3; p. 58 par. 2] Fer konparezon i ed lezot pour vwar dan ki fason laverite i diferan avek lezot krwayans. Zezi ti fer diferans ant bann krwayans ki ti popiler dan Lalwa Moiz ek vre lobzektif Lalwa, ant vre latasman avek Bondye ek bann aksyon ipokrit bann Farizyen, ant en leta lespri pour dominen ek en leta lespri sakrifis, e ant bann ki krwar zot zis ek bann ki vreman repantir. (Mat. 5:21-48; 6:1-18; 20:25-28; 21:28-32)
8. Kontrerman avek bann Farizyen, konman lansennyman Zezi ti tous leker bann dimoun? [be p. 59 par. 2-3] Zezi ti ansenny lobeisans senser ki ganny motive par lanmour pour Bondye. (Mat. 15:8) I ti ankouraz bann dimoun pour demann zot lekor akoz zot fer tel ou tel keksoz. (Mark 2:8) Parkont, bann Farizyen ti inyor bann keksoz pli enportan e met bokou lanfaz pour konform avek bann pti detay e konform avek zot prop lareg. Sa ti fer zot zis annan en laparans sentete. (Lik 11:42)
9. Konman nou kapab ed bann ki nou ansennyen pour aplik sa ki zot pe aprann, san ki nou fer zot bann desizyon? [be p. 60 par. 1-3] Pandan ki nou pe ansenny en prensip Labib, nou kapab mansyonn en sitiasyon dan lavi toulezour e demann nou bann etidyan konman sa prensip Labib pou kapab ed zot pour byen rezourd sa sitiasyon. Ler nou eksplik e aplik byen bann verse Labib, parey Pyer ti fer zour Lapannkot, bann ki pe rod laverite pou souvannfwa santi zot pouse pour fer en bon desizyon. (Akt 2:37)
10. Ki mannyer nou devret reponn bann kestyon ki lezot i demande konsernan bann keksoz ki en dimoun i devret desid pour li menm? [be p. 69 par. 4-5] Nou devret toultan reponn zantiman. (Kol. 4:6) Vi ki nou konnen ki nou ti pou fer, nou bezwen gard antet ki sak dimoun i responsab pour son prop desizyon dan lavi. (Gal. 6:5) Alor, ler en dimoun i demann nou ki nou ti pou fer dan en tel sitiasyon, nou devret diriz son latansyon ver bann prensip ek legzanp dan Labib oubyen montre li konman pour fer son prop resers pour li form son prop kapasite konpreansyon pour ‘fer diferans ant sa ki byen ek sa ki mal.’ (Ebr. 5:14)
LEKTIR LABIB LASEMENN
11. Akoz Moiz ti bezwen swiv byen “model pour tabernak e model pour tou son bann meb”? (Egz. 25:9) [it-2-E p. 1058 par. 7, it-2-F p. 1031 par. 6] Sa model ti servi konman “en lonbraz sangtyer ki dan lesyel.” An realite i ti pe reflekte en keksoz spirityel, e alors i ti bezwen egzakt dan tou laspe. (Ebr. 8:5)
12. Ki nou kapab aprann dan larepons ki Aaron ti donn Moiz konsernan sa lensidan bef annor? (Egz. 32:24) Bann zefor pour esey eskiz ouswa zistifye nou lekor i souvannfwa paret bet oubyen pa fer sans. Nou devret aksepte ki nou responsab ouswa aksepte pour ganny blanmen pour nou fot. [3, g73-E 8/2 p. 3, g73-F 22/6 p. 3; w59-E p. 626 par. 2-3]
13. Ki nou kapab aprann avek lafwa ki bann Izraelit ti demontre pour obeir komannman Zeova dan Egzod 34:23, 24? Lafwa dan promes Zeova ti ganny teste ler bann garson ek zonm Izraelit ti ganny demande pour al Zerizalenm trwa fwa par an pour asiste lasanble. Bann Zwif ti antoure avek bann lennmi. Dapre en pwennvi imen, sa bann lennmi ti ganny en bon loportinite pour atak sa pei ler tou bann zonm ti’n al lafet Zerizalenm. Pareyman ozordi, pour asiste bann renyon ek bann lasanble i demann lafwa ferm dan promes Bondye ki nou bezwen fizik pou ganny pran swen avek si nou rod Rwayonm premye. (Mat. 6:33) [4, w98 1/9 p. 20; w67 p. 436 (Angle/Franse)]
14. Ki ti bi sakrifis konminyon? (Lev. 3:1) Sa sakrifis ti ganny fer pour selebre sa bon kondisyon lape ki ti egziste ant Bondye avek bann ki Bondye ti aprouve. Bann pret ek sa dimoun ki ti ofer ti manz sa sakrifis apre ki disan ek lagres ti’n ganny ofer avek Zeova. Dan en fason enpresyonan e senbolik, sa enn ki pe ofer sakrifis, bann pret, ek Zeova ti pe partaz en repa, ki montre sa relasyon anpe ki ti egziste parmi zot. [6, w00 15/8 p. 15 par. 15 (Angle/Franse)]
15. Ki mannyer sa prosedir pour enstal Aaron konman gran pret, ki ganny rikorde dan Levitik 8:23, i aplik senbolikman avek Zezi? [it-2-E p. 1113 par. 4, it-2-F p. 460 par. 3; w68-E p. 399 par. 24] Pandan son minister ki ti dir pour trwa zan edmi lo later kot apre i ti pou sakrifye son lavi, Kris ti kontinyen ekout gidans Zeova parey in ganny dir dan son Parol. Son bann abilite fizik ek mantal e son bann resours ti fini tou dan travay ki i ti’n gannyen; i ti donn son meyer. Deplis Zezi pa ti zanmen aret mars dan semen fidelite.