Lanz pe ed nou
1 “Konnen ki mwan mon avek zot toulezour, ziska lafen dimoun.” Sa parol i ankourazan pour tou bann ki pran aker lord Zezi: “Ale e fer tou pep vin mon bann disip”! (Mat. 28:18-20) Dan en fason enportan, Zezi i servi son bann lanz pour montre ki i avek bann vre Kretyen. (Mat. 13:36-43) Pa i en keksoz merveye pour anons sa “levanzil eternel” ansanm avek sa bann lanz fidel!—Rev. 14:6, 7.
2 Dan Predikasyon: Labib i dir ki bann lanz i ganny anvoye “pour donn led tou bann ki devre ganny sove.” (Ebr. 1:14) Dan premye syek, bann lanz ti ed bann disip Zezi pour trouv bann dimoun senser. (Akt 8:26) Denozour, bann serviter Bondye i kontinyen vwar laprev direksyon bann lanz. Plizyer fwa, bann dimoun in dir ki zot ti pe priye pour ganny led ler en Temwen ti vizit zot. Ansanm avek bann lanz, nou tre kontan ler bann dimoun koumsa i aksepte mesaz Rwayonm!—Lik 15:10.
3 Fer fas avek Lopozisyon: Danyel ek son trwa konpanyon Ebre, zapot Pyer, ek plizyer lezot ki’n pas atraver bann gro leprev in eksperyans proteksyon Zeova par mwayen bann lanz, “ki annan gran pwisans.” (Ps. 103:20; Dan. 3:28; 6:21, 22; Akt 12:11) Menm si parler nou santi ki nou napa okenn proteksyon ler nou rankontre lopozisyon, nou kapab ganny ankouraze par leksperyans serviter Elisa letan i ti aprann ki “i annan plis ki avek nou ki bann ki avek zot.” (2 Rwa. 6:15-17) Menm si nou’n bezwen separe avek nou bann frer ek ser Kretyen par-d-fors, nou pa perdi lespwar. Parol Bondye i asir nou: “Lanz Zeova pe kanpe toultour bann ki annan lakrent pour li.”—Ps. 34:7.
4 Byento bann larme lanz pou vin retir tou sa ki opoz lotorite Kris. (Rev. 19:11, 14, 15) Pandan ki nou pe esper sa zour, annou kontinyen loue Zeova avek lardyes, e met tou nou konfyans dan sipor ki nou gannyen atraver sa larme seles pwisan ki anba komann Kris.—1 Pyer 3:22.