Imit Lazistis Zeova
1 “Zeova i kontan lazistis.” (Ps. 37:28) Alor, menm si i’n donn lord ki sa lemonn ki ranpli avek lenzistis pou ganny detri, i’n fer laranzman pour ki en lavertisman i ganny donnen avan sa i arive. (Mark 13:10) Sa i donn dimoun loportinite pour repantir e ganny sove. (2 Pyer 3:9) Eski nou esey imit lazistis Zeova? Eski latristes ek soufrans ki imen pe pas atraver i pous nou pour partaz lesperans Rwayonm avek lezot? (Prov. 3:27) Lanmour pour lazistis pou pous nou pour fer tou sa ki nou kapab pour partisip dan predikasyon.
2 Pres avek Dimoun san fer Preferans: Ler nou dir tou dimoun plan Bondye san fer preferans, nou “demontre lazistis.” (Mik. 6:8) Nou devret reziste sa tandans ki imen enparfe i annan pour ziz lezot dapre zot laparans. (Zak 2:1-4, 9) Zeova i “oule ki tou dimoun i ganny sove e ganny konnesans laverite.” (1 Tim. 2:4) Parol laverite Bondye i kapab fer bann sanzman remarkab dan lavi dimoun. (Ebr. 4:12) Ler nou realiz sa, nou kapab santi nou pouse pour apros bann dimoun avek konfyans, menm bann ki pa ti oule ekout nou dan lepase.
3 En ser ki travay dan en laboutik ti en pe per en kliyan ki abitye vin dan laboutik akoz son laparans fizik. Toudmenm, ler i ti ganny en loportinite apropriye, i ti esey pres avek li konsernan Paradi ki Bondye in promet. San ezite i ti reponn ki i pa krwar dan sa bann zistwar, e ki i servi drog. Me sa ser pa ti bes lebra. En zour sa zonm ti demann li ki i panse lo son gran seve. Alor, sa ser ti eksplik li avek bokou latansyon ki Labib i dir lo sa size. (1 Kor. 11:14) Son lannmen, sa ser ti vreman sirprann pour vwar sa zonm in raze e avek seve kourt. I ti demann en letid Labib, ki en frer ti vreman kontan pour fer li. Sa zonm ti progrese ziska dedikasyon ek batenm. Parey sa zonm, bokou dimoun ki pe servi Zeova ozordi i rekonesan pour sa kantite zefor san preferans ki bann ki’n anmenn sa mesaz Rwayonm kot zot in fer.
4 Byento, Zeova pou retir lenzistis lo later. (2 Pyer 3:10, 13) Dan sa pti gin letan ki reste, annou imit lazistis Zeova par donn tou dimoun en loportinite pour sov destriksyon sa lemonn Satan ki ranpli avek lenzistis.—1 Zan 2:17.