Eski ou kapab ede?
1 Zeova i toultan pe rod fason pour ed son bann serviter fidel. (2 Kron. 16:9; Iza. 41:10, 13) Par konpar li avek en berze, Izai ti ekrir: “Avek son lebra i pou rasanble bann pti mouton ansanm; e i pou anmenn zot dan son lebra. I pou pran swen avek bann ki pe donn tete.” (Iza. 40:11) Konsider serten fason ki nou kapab imit lentere ranpli avek lanmour ki Zeova i demontre.
2 Ed bann Nouvo: Nou kapab ede ler nou envit bann nouvo pour rezwir bon lasosyasyon avek nou. (Prov. 13:20) En frer ki rapel konman lezot ti ed li ler i ti konmans asosye avek kongregasyon, ti dir: “Plizyer fwa, en fanmiy ti enkli mwan dan zot letid Labib kot zot lakour. Anmezir ki mon ti progrese, en zenn koup pionye ti regilyerman envit mwan pour travay avek zot en zournen dan predikasyon. Nou ti toultan fer bann bon konversasyon spirityel.” I ti azoute: “Avan mon ti vin en Kretyen, mon ti abitye sorti dan bann Vandredi ek Sanmdi swar. Me letan ki mon ti pase avek bann frer ek ser ti ranpli sa bezwen ki mon ti annan pour asosye avek lezot.” Lentere ranpli avek lanmour ki sa kongregasyon ti demontre ti ed sa frer pour byen anrasinen e stab dan lafwa. Aprezan i pe servi konman en manm lafanmiy Betel.—Kol. 2:6, 7.
3 Batir Kanmarad: Nou kapab trouv en loportinite pour ede ler nou bann frer ek ser i rankontre bann sitiasyon difisil. Eski ou kapab fer laranzman pour rann temwannyaz par telefonn ansanm avek en proklanmater ki malad ouswa envit li pour akonpanny ou lo en letid Labib, petet menm anmenn sa etidyan kot son lakour? Petet en paran avek bann pti zanfan pou apresye en led ler i pe partisip dan predikasyon. Eski i annan bann ki timid ki ti pou apresye ou led ler pe fer retourn vizit oubyen ler pe partisip dan lezot laspe predikasyon? Lentere avek lanmour pour nou bann frer ek ser pou pous nou pour rod bann fason pour batir zot.—Rom. 14:19.
4 Ler nou imit lentere ranpli avek tandres ki Zeova i demontre pour son bann serviter, nou fortifye kanmarad, nou ini kongregasyon ansanm dan lanmour, e nou glorifye nou Papa ki dan lesyel.—Efe. 4:16.