Kwen Kestyon

◼ Ki mannyer nou devret akonpli bann travay dan kongregasyon?

Kongregasyon pep Zeova i fonksyonn dan lord akoz zefor tou dimoun. (1 Kor. 14:33, 40) Mazin tou sa bann keksoz ki bezwen ganny fer pour zis en renyon. Apard sa progranm li menm, i annan bokou keksoz ki ganny fer avan e apre renyon par bann frer ek ser ki annan diferan responsabilite dan kongregasyon. Serten travay ki lezot dimoun pa vwar i osi enportan. Ki mannyer sakenn ant nou i kapab siport sa laranzman?

Fer ou disponib. Bann ki annan en lespri volonter pou vwar en kantite keksoz pour fer. (Ps. 110:3) Montre lentere anver bann ki malad e bann ki aze. Ede netway Lasal Rwayonm. Nou kapab fer bokou travay itil san ganny demande pour fer. Nou zis bezwen anvi ede.

Servi avek limilite. Dimoun ki annan limilite i kontan pour servi lezot. (Lik 9:48) Limilite pou anpes nou aksepte plis travay ki nou kapab fer. Deplis, limilite pou anpes nou fer keksoz ki nou napa lotorite pour fer.—Prov. 11:2.

Montre ou diny konfyans. Moiz ti ganny ankouraze pour swazir “bann zonm diny konfyans” pour akonpli bann responsabilite dan ansyen Izrael. (Egz. 18:21) Sa menm kalite i neseser ozordi. Akonpli sak travay ki ou gannyen avek bokou latansyon. (Lik 16:10) Si ou pa pou kapab akonpli en travay, fer sir ki laranzman neseser i ganny fer pour en lot dimoun fer li dan ou plas.

Fer ou mye. Bann Kretyen i ganny ankouraze pour travay avek tou zot leker menm dan bann aktivite toulezour. (Kol. 3:22-24) I annan plis rezon pour fer sa ler nou pe fer keksoz pour avans vre ladorasyon. Menm si en travay i paret napa lenportans, i vin en benediksyon pour kongregasyon ler i ganny fer byen.

Sak travay ki nou gannyen pour fer i donn nou en loportinite pour demontre nou lanmour pour Zeova e pour nou bann frer ek ser. (Mat. 22:37-39) Annou fidelman akonpli nenport travay ki nou gannyen pour fer.