En Let Sorti Kot Konsey Direkter

“KI BONDYE, nou Papa, e Senyer Zezi-Kri i donn zot lagras ek lape.” Sa i salitasyon ki Pol ti servi dan son bann let ki i ti ekrir bann kongregasyon. I osi sa ki nou osi nou swete pour zot tou.—Efe. 1:2.

Nou vreman apresye labonte sorti kot Zeova ki i’n demontre atraver sakrifis Zezi Kri! Gras a sa sakrifis, nou kapab ganny laprouvasyon Bondye. Nou pa ti pou zanmen kapab ganny li, menm si nou ti pou fer zefor, etidye Labib pli oprofon ki nou kapab, pres sa bon nouvel, oubyen fer bann bon aksyon. Nou ganny pardon nou pese e osi posibilite pour ganny lavi eternel, pa konman en rekonpans pour nou bann zefor, me konman en don ki reflekte labonte Zeova atraver Zezi Kri.—Rom. 11:6.

Pol ti ekrir son bann konpanyon Kretyen: “Nou sipliy zot pour pa les perdi sa lagras ki zot in resevwar. Dan Lekritir in dir: ‘O moman favorab, mon’n ekout ou; zour delivrans, mon’n sekour ou.’ Ozordi i sa letan favorab, ozordi i sa zour delivrans.” Ti annan en “letan favorab” avan destriksyon Zerizalenm dan premye syek. Bann dimoun ki ti annan leker senser e ki ti kontan Zeova ti ganny sove dan en sans spirityel. Finalman, sa ti fer tou bann fidel ki ti’n sorti Zerizalenm avan son destriksyon an 70 N.L., ganny sove dan en sans fizik.—2 Kor. 6:1, 2.

Ozordi, nou osi nou pe viv dan en “letan favorab” e en “zour delivrans.” Bann ki Zeova i aksepte konman son serviter e ki’n ganny sove spirityelman i annan lespwar pour ganny sove dan en sans fizik dan “gran zour Zeova” ki aprezan tre pros.—Tsef. 1:14.

Sa zour Zeova ki pe aprose i met en gran responsabilite lo nou. Nou bezwen averti bann dimoun e ed bann ki annan leker senser pour benefisye avek labonte Zeova pour ki zot osi zot kapab ganny sove. Pol ti vreman apresye sa responsabilite. I ti ekrir: “Maler pour mwan si mon pa anons Levanzil!” I ti osi dir son santiman: “Mon konsider li konman mon devwar pour vizit . . . bann savan, konman bann inyoran. Pour sa menm rezon ki mon annan sa gran dezir pour vin anons zot osi Levanzil.”—1 Kor. 9:16; Rom. 1:14, 15.

Devan Zeova nou pou responsab si nou negliz sa travay enportan pour averti bann dimoun. Zeova ti fer profet Ezekyel vin en gardyen pour pep Izrael e ti dir li: “Ou devret antann parol sorti dan mon labous e ou devret averti zot pour mwan. Ler mon dir avek en dimoun mesan, ‘Sirman ou pou mor,’ e ou pa vreman averti li e koze pour averti sa enn mesan pour sorti dan son move semen, pour li reste vivan, sa enn ki mesan li, i pou mor dan son fot, me mon pou demann son disan dan ou lanmen.”—Ezek. 3:17, 18.

I difisil pour viv dan sa bann dernyen zour. I pa fasil pour byen balans bann responsabilite fanmiy, aktivite toulezour, aktivite kongregasyon, ek predikasyon. Deplis, bokou parmi zot i bezwen fer fas avek maladi, depresyon, lavyeyes, e menm lopozisyon. Laplipar zot pe “anmenn en fardo.” Nou oule senpatiz avek zot anliny avek sa ki Zezi ti dir: “Vin kot mwan zot tou ki fatige e ki pe anmenn en fardo e mwan, mon a donn zot repo.” (Mat. 11:28) Nou oule felisit zot tou ki fer bokou zefor pour kontinyen servi Zeova fidelman malgre bann difikilte ki swa gro oubyen pti.

An rezilta zot predikasyon ek lansennyman ki zot fer avek devouman e osi akoz benediksyon Zeova, apepre 4,762 dimoun i batize sak semenn atraver lemonn. Pandan lannen servis ki’n pase, 1,375 nouvo kongregasyon ti ganny formen. Nou espere e priye ki sa nouvo liv Ki Labib i vreman dir?, ki deza disponib dan plis ki 120 langaz, pou ed plizyer milyon dimoun benefisye avek labonte ek lape sorti kot Zeova pandan sa “zour delivrans.”

Nou oule asir zot ki Konsey Direkter i kontan zot e nou priy pour zot. Nou osi remersi zot pour zot lapriyer ki zot fer pour nou.

Zot bann frer,

Konsey Direkter Temwen Zeova