En Let Sorti Kot Konsey Direkter

PAR swiv legzanp Zezi, nou senserman priy Bondye: “Ki ou non sen i ganny glorifye.” Nou profon dezir pour viv an armoni avek sa lapriyer i ganny demontre par lafason ki nou viv nou lavi konman bann Temwen Zeova. Byensir, nou bezwen konn plis ankor ki senpleman konn non Bondye. Nou devret sezi tou loportinite pour glorifye sa non. Vreman, sa pli gran loner ki sakenn de nou i kapab rezwir se ganny apele en Temwen Zeova.—Mat. 6:9; Iza. 43:10.

An armoni avek Psonm 110:3, pep Zeova pe volonterman fer sa travay ki Zeova in dir i devret ganny fer. Akoz dimoun diferan laz ek lorizin pe donn zot letan ek lenerzi dan sa travay predikasyon? Premyerman, se akoz zot lanmour pour Bondye ek devosyon personel pour li. Deterononm 6:5, 6 i demann nou pour kontan Zeova avek ‘tou nou leker, nanm, e tou nou lafors.’ Sa lanmour ki sorti ofon nou leker i pous nou pour servi nou letan, lenerzi, ek resours pour fer avanse lentere Rwayonm Bondye e sa i enkli partisip dan predikasyon otan ki nou sirkonstans i permet.

Lanmour Zeova pour limanite i motiv li pour donn son direksyon pour ki sa bon nouvel lo son Rwayonm i ganny anonse partou lo later. I pa oule ki personn i ganny detri, me ki tou dimoun i arive repantir par abandonn zot move fason viv e tourn ver zot Kreater pour ki zot a viv. (2 Pyer 3:9) Zeova i dir: “Mon pa pran plezir dan lanmor en dimoun mesan, me mon kontan ler en dimoun mesan i aret swiv son semen e reste vivan.” (Ezek. 33:11) Ler nou partisip dan predikasyon, nou donn levidans lanmour Zeova pour nou prosen. Definitivman sa i kontribye pour sa lazwa ek satisfaksyon ki nou eksperyanse ler nou pran par dan sa travay predikasyon.

Nou profon lanmour pour Zeova i osi reflekte par lafason ki nou vwar son Parol enspire, Labib. San Labib, nou pa ti pou’n arive konn Zeova e vin pros avek li, parey Zak 4:8 i envit nou pour fer. Nou pa ni ti pou konnen akoz nou la e ki pou arive alavenir. Nou pa ti pou konnen ki nou premye zanset Adan i sours nou bann problenm. (Rom. 5:12) Nou pa ti pou ni konn sa gran lanmour ki Bondye in demontre par donn son sel Garson konman en ranson pour nou. Dan en kantite lezot fason, Zeova pe donn nou en pe son konnesans, lasazes, ek konprenezon. Pa nou apresye sa kado ki i’n donn nou, son Parol enspire Labib! Nou lapresyasyon pour sa kado merveye i pous nou pour “servi byen tou bann lokazyon” pour lir, etidye, e reflesir lo son Parol. (Efe. 5:15, 16; Ps. 1:1-3) Nou pa devret vwar li en fardo pour fer letan pour lir Parol Bondye toulezour. Plito, nou lanmour pour Bondye i devret atir nou ver son Parol, permet nou pour konpran Bondye pli byen e ogmant nou lanmour pour li.

Nou’n aprann atraver Labib ki ler Adan ti fer pese kont Zeova, i ti anmenn tou son desandans, enkli sakenn ant nou, dan en sitiasyon dezespere e deplorab. Me, Bondye ti kapab e i ti fourni en mwayen pour limanite, par pran bann mezir pour fer sir ki son plan pour later i ganny akonpli.—Zen. 3:15.

San dout nou tou nou annan en gran dezir pour glorifye sa non merveye nou Bondye. Anmezir nou konnesans pour ki kalite Bondye Zeova i ete i grandir, nou santi nou motive pour korpere avek li ek son lorganizasyon pour fer konnen son gran non ek plan. Deplizanpli nou pou vin pli konfidan ki nou annan son laprouvasyon ek sipor la konmela e dan nouvo lemonn pour touzour.

Nou bann manm Konsey Direkter nou anvi asir nou lanmour pour zot nou bann frer ek ser. Nou osi anvi eksprim nou profon lapresyasyon pour zot gran zefor, pandan sa letan ki reste avan ‘sa gran ladetres,’ pour ariv kot otan dimoun posib avek sa bon nouvel. (Rev. 7:14) An fezan sa, ou donn zot sa menm loportinite ki ou’n gannyen, sa se ganny sa konnesans Bondye ek Zezi ki anmenn ver lavi eternel.—Zan 17:3.

Zot bann frer,

Konsey Direkter Temwen Zeova