Kwen Kestyon
◼ Eski “lesklav fidel e pridan” i dakor ki plizyer group Temwen endepandan i zwenn ansanm pour fer resers oubyen fer deba lo Labib?—Mat. 24:45, 47, NW.
Non. Me pourtan dan plizyer pei dan lemonn, detrwa dimoun ki asosye avek nou lorganizasyon in form bann group ki fer resers lo zot menm lo bann size ki baze lo Labib. Serten in zwenn ansanm pour etidye Lekritir Ebre ek Grek dan en group ki endepandan pour zot analize si New World Translation i egzakt. Serten i fer resers lo bann size syantifik ki relye avek Labib. Zot in kree bann sit Internet ek chat rooms avek bi pour fer deba e partaz zot pwennvi. Zot in fer bann konferans e prodwir bann piblikasyon pour prezant sa ki zot in trouve. E sa i azout lenformasyon anplis ki sa ki ganny dir dan nou bann renyon e dan nou bann piblikasyon.
Atraver lemonn, pep Zeova pe resevwar lenstriksyon spirityel annabondans ek lankourazman dan renyon ek lasanble, e osi dan bann piblikasyon pibliye par lorganizasyon Zeova. Anba gidans son lespri sen e baze lo son Parol ki laverite, Zeova i fourni sa ki neseser pour ki pep Bondye i kapab “reste byen ini ansanm dan en menm lespri e en menm lopinyon” e reste “pli ferm dan lafwa.” (1 Kor. 1:10; Kol. 2:6, 7) Vreman nou rekonesan pour sa bann provizyon spirityel ki Zeova i donn nou dan sa bann dernyen zour. Alors, “lesklav fidel e pridan” pa siport okenn piblikasyon, renyon oubyen sit Internet ki pa ganny prodwir oubyen pibliye anba son sipervizyon.—Mat. 24:45-47, NW.
I byen pour bann dimoun ki anvi servi zot abilite pour reflesir pour siport sa bon nouvel. Parkont, nou pa devret les nou lanbisyon personnel fer sa ki Zezi Kri pe akonplir atraver son kongregasyon lo later ozordi perdi son valer. Dan premye syek, zapot Pol ti averti bann kretyen pour pa enplik zot dan bann size ki pran bokou letan e ki fatigan, parey “sa bann long lalis zanset. Tousala i plito fer diskisyon, e i pa realiz plan Bondye dan lafwa.” (1 Tim. 1:3-7) Tou Kretyen i devret fer bokou zefor pour “evite fer bann diskisyon bet, bann long lalis zanset, kerel ek lager konsernan Lalwa. Tousala i initil e san valer.”—Tit 3:9.
Pour bann ki anvi fer letid Labib anplis ek resers, nou konsey zot pour etidye Insight on the Scriptures, “All Scripture Is Inspired of God and Beneficial,” ek lezot piblikasyon ki nou’n pibliye, parey sa bann ki diskit bann profesi ki ganny trouve dan liv Danyel, Izai ek Revelasyon. Sa bann piblikasyon i fourni nou avek en kantite lenformasyon pour etidye Labib e medite, pour ki nou kapab ganny “ranpli . . . avek konnesans son lavolonte, avek lasazes ek konpreansyon ki son Lespri i donnen, pour ki [nou] ava kapab viv, en lavi ki Bondye i aprouve e ki fer li plezir dan tou sa ki [nou] fer. Koumsa par [nou] bon travay [nou] ava prodwi fri, e [nou] ava progrese dan konnesans Bondye.”—Kol. 1:9, 10.