“Ki zot parol i touzour agreab”
1. Ki savedir ‘asezonn nou parol avek disel’?
1 “Ki zot parol i touzour agreab e enteresan, [oubyen asezonnen avek disel] pour zot kapab donn bann repons valab tou dimoun.” (Kol. 4:6) Dan langaz Grek, asezonn nou parol avek disel ti vedir swazir mo apropriye e koz dan en fason ki pou fer lezot kontan pour ekoute. Sa i tre enportan kan nou al dan predikasyon.
2. Konman Zezi ti kapab koz lo laverite avek en madanm Samariten?
2 Legzanp Zezi: Kan i ti pe repoze obor en pwi, Zezi ti pran sa linisyativ pour koz avek en madanm Samariten ki ti vin rod delo kot sa pwi. Plizyer fwa dan sa diskisyon, sa madanm ti dir keksoz ki montre ki ti annan en laenn ant bann Zwif ek Samariten depi en pake letan. I ti osi dir ki bann Samariten i desandans Zakob, menm si bann Zwif ti vreman krwar ki bann Samariten pa sorti dan desandans Zwif. Olye konmans fer largiman lo sa ki sa Samariten ti dir, Zezi ti gard sa konversasyon pozitif. Finalman i ti kapab koz avek li lo laverite ki ti ed li ek bann dimoun dan sa lavil.—Zan 4:7-15, 39.
3. Konman nou kapab swiv legzanp Zezi ler nou dan predikasyon?
3 Anmezir ki nou prese nou devret gard antet nou lobzektif. Sa se pour “anons bonn nouvel.” (Rom. 10:15) Nou anvi partaz en pwen dan Labib ki enteresan e ankourazan avek sa met lakour, nou pa anvi fer li santi ki nou pe vin atak son bann krwayans. Menm si i dir en keksoz ki fo, nou pa devret taye pour koriz li. Eski i annan en keksoz ki i’n dir ki nou kapab tonm dakor lo la oubyen pour felisit li senserman? Petet nou kapab montre li en verse Labib, an dizan: “Eski ou’n deza mazin koumsa?”
4. Ki nou devret fer si sa met lakour i brit avek nou?
4 Me si sa met lakour i koz brit avek nou oubyen i zis anvi argimante? Nou devret kontinyen reste amikal, kalm dan lafason ki nou azir ek parol ki nou servi. (2 Tim. 2:24, 25) Si sa dimoun pa enterese avek sa mesaz Rwayonm, i byen ki nou zis les li dan en fason ki pa pou ofans li.—Mat. 7:6; 10:11-14.
5. Ki mannyer en ser ti ganny bon rezilta apre ki i ti’n reponn dan en bon fason?
5 Bon rezilta: Kan en ser ti esey koz lo laverite avek son vwazen, avek lakoler sa madanm ti konmans kriye e zour li. Byen trankilman, nou ser ti dir: “Mon regrete ki ou santi koumsa. Pas en bon lazournen.” De semenn plitar, sa madanm ti vin tap laport kot sa ser e demann lekskiz pour lafason ki i ti’n azir. I ti dir ki aprezan i ti a kontan ekoute ki sa ser i annan pour dir. Ler nou reponn dan en bon fason, souvan i anmenn bon rezilta!—Prov. 15:1; 25:15.
6. Akoz i enportan pour annan bann parol agreab dan predikasyon?
6 Fer zefor pour annan bann parol agreab ler ou pe pres sa bon nouvel. Menm a sa moman ki sa met lakour pa oule ekoute, petet en lot fwa ki ou repase i pou anvi ekoute.