Kwen kestyon

◼ Eski i apropriye pour lodyans aplodi apre sak prezantasyon dan Lekol Minister Teokratik ek Renyon Servis?

Kan Zeova, nou Kreater, ti kree later “bann zetwal bomaten ti kriye ansanm dan lazwa, e tou bann garson Bondye ti konmans aplodi.” (Zob 38:7) Bann garson Bondye setadir bann lanz ti anvi loue Zeova pour son travay kreasyon merveye, ki ti en nouvo fason pour demontre son lasazes, labonte ek pwisans.

I byen pour nou eksprim nou lapresyasyon senser pour zefor nou bann frer ek ser e pour lenformasyon ki zot prezante dan en diskour oubyen demonstrasyon. Par egzanp, normalman nou aplodi apre en diskour ek prezantasyon dan bann rasanbleman spesyal parey bann lasanble. Bokou zefor e plis letan in ganny met dekote pour prepar sak parti ki ganny prezante. Kan nou aplodi nou demontre nou lapresyasyon pa zis pour sa orater me osi pour lenstriksyon ki Zeova i donn nou atraver son Parol ek lorganizasyon.—Iza. 48:17; Mat. 24:45-47.

Me ki nou pou dir konsernan aplodi apre en prezantasyon dan Lekol Minister Teokratik? Napa lareg ki enterdi pour aplodi kan i ganny fer dan en fason natirel pour eksprim lapresyasyon, par egzanp apre ki en etidyan in termin son premye ekspoze dan lekol Teokratik. Parkont, si nou aplodi apre sak prezantasyon i kapab vin zis en routin san ki nou demontre en lapresyasyon senser e fer ki i perdi son vre sans. Pour sa rezon alor nou pa aplodi apre sak prezantasyon.

Menm si nou pa aplodi apre sak ekspoze dan Lekol Minister Teokratik ek Renyon Servis, i annan lezot fason ki nou tou nou kapab eksprim nou lapresyasyon pour sa lenstriksyon ek zefor pour bann ki prezant bann ekspoze. Nou kapab fer sa par ekout atantivman e donn tou nou latansyon sa orater. Apre renyon i souvan posib pour personnelman apros sa dimoun ki’n prezant sa ekspoze e eksprim nou lapresyasyon pour son zefor.—Efe. 1:15, 16.