Eski ou fanmir pe prepare pour sirviv sa destriksyon?
1 Lakonplisman profesi dan Labib i donn bann levidans konvenkan ki lafen sa move lemonn pe aprose byen vit. Nou pe viv dan en letan difisil zis parey sa letan avan Deliz. (Mat. 24:37-39) Noe ti sirviv destriksyon sa ansyen lemonn akoz i ti “mars avek sa vre Bondye.” (Zen. 6:9) Sirman Noe ti’n bezwen ansenny son fanmir konsernan lalwa Zeova parski zot osi zot ti sirviv sa Deliz. Dan ki fason nou kapab imit Noe e prepare konman en fanmir pour sirviv lafen sa move lemonn?
2 Predikater lazistis: Noe ti persevere pour apepre 40 a 50 an konman “en predikater lazistis.” (2 Pyer 2:5) Ki swa son bann kontanporen ti anba lenfliyans bann lanz rebel ki ti’n pran lekor imen oubyen non, i bezwen ki zot ti sikann li akoz i ti pres avek zot. Dan nou minister nou souvan zwenn bann dimoun ki pa montre lentere e ki sikann nou, sa i laprev ki sa lemonn pe ariv ver son lafen. (2 Pyer 3:3, 4) Me kantmenm sa, tou lekontrer avek bann dimoun dan letan Noe, bokou dimoun pe reazir anver nou zefor e pe “al ver” ladorasyon Zeova. (Iza. 2:2) Nou pou sov ‘nou lekor ek tou bann ki ekout nou’ si selman nou persevere. (1 Tim. 4:16) Pa i vreman esansyel pour bann paran ansenny zot zanfan atraver zot parol ek legzanp ki sa travay predikasyon i irzan!—2 Tim. 4:2.
3 I ti fer “egzakteman parey”: Pour Noe ek son fanmir sirviv, tou ti depan lo si zot ti byen swiv lenstriksyon Zeova. (Zen. 6:22) Ozordi osi i enportan pour nou ‘pare pour swiv’ gidans sorti dan Labib ek lesklav fidel. (Zak 3:17) En papa ti aplik bann sizesyon sorti kot lorganizasyon Zeova. Par egzanp, i ti kondwir en letid fanmir sak semenn e al dan predikasyon an fanmir tou le wikenn parey nou’n ganny ankouraze pour fer. I ti fer tou son mye pour ki en diferan zanfan i akonpanny li sak semenn dan predikasyon. Son determinasyon pour fer “egzakteman parey” lorganizasyon i sizere in fer en gran lefe lo son bann zanfan e zot tou le sis in grandi pour vin bann fidel serviter Zeova.
4 Lafen sa sistenm pou ariv en sel kou. (Lik 12:40) Si nou ek nou fanmir i imit legzanp Noe e egzers lafwa, nou pou’n sirman pare pour ganny sove!—Ebr. 11:7.