Nou detrir tou bann fo rezonnman
1 Pour plizyer syek, Satan in servi fo lansennyman ek trik pour kree bann baryer dan leker ek lespri bokou dimoun. I’n propaz bann fo lansennyman tel ki Trinite, nanm imortel ek lanfer dife. I’n senm dout lo legzistans en Kreater e osi senm dout si Bondye i loter Labib. Nasyonalism e rasizm i lezot baryer ki kree bann lobstak ki anpes dimoun aksepte laverite. (2 Kor. 4:4) Ki mannyer nou kapab detrir sa bann fo rezonnman?—2 Kor. 10:4, 5.
2 Santiman i enplike: Bann lansennyman ki dimoun in toultan krwar i laverite, i souvan enplik santiman profon sa dimoun. I annan ki’n ganny sa bann lansennyman depi zot lanfans. Pour kapab ed zot, nou bezwen koz dan en fason ki demontre respe vizavi zot pwennvi.—1 Pyer 3:15.
3 Nou kapab demontre respe pour sa bann dimoun par les zot eksprim sa ki zot krwar e rezon akoz zot krwar sa. (Zak 1:19) Kekfwa zot senserman krwar ki nanm i kontinyen viv apre lanmor, akoz zot in perdi dimoun ki zot ti kontan dan lanmor ki zot swete revwar ankor. Oubyen zot selebre serten lafet akoz zot kontan sa loportinite pour pas en bon letan avek zot fanmir. Si nou ekout zot eksprim zot santiman, sa pou ed nou konpran akoz zot santi koumsa e an retour azir dan en fason efikas.—Prov. 16:23.
4 Imit Zezi: Zezi in donn nou en legzanp ekselan ler i ti reponn kestyon en zonm ki ti konn byen Lalwa. Zezi pa ti donn bann larepons direk ki ti kapab fer sa zonm pa ekoute akoz i ti senserman krwar dan son krwayans. Plito, Zezi ti refer avek lekritir e i ti envit li pour eksprim son pwennvi e ed li pour rezonnen par servi en legzanp.—Lik 10:25-37.
5 Parol Bondye i kapab fer dimoun rezet bann fo lansennyman relizye. (Ebr. 4:12) Par annan pasyans pour eksplik laverite avek bann ki ekout nou, sa i kapab tous zot leker e kapab ed zot pour rezet fo lansennyman e kontan laverite ki kapab fer zot lib.—Zan 8:32.