Progranm lasanble spesyal pour lannen 2010
1. (a) Ki tenm baze lo Labib ki’n ganny devlope dan bann lasanble spesyal dan lepase? (b) Eski i annan okenn pwen enteresan an partikilye dan bann lasanble spesyal dan lepase ki’n ed ou dan ou minister?
1 “Verifye sa ki pli enportan,” “Reste ferm konman en sel troupo,” “Kontinyen servi konman temwen pour laverite” e “Nou, nou larzil, e Zeova i nou potye.” (Fili. 1:9, 10, 27; Zan 18:37; Iza. 64:8) Sa i detrwa parmi sa plizyer tenm ki ti ganny diskite dan bann lasanble spesyal dan lepase. Eski ou enpasyan pour asiste lasanble spesyal lannen servis 2010? Sa tenm “Letan i kourt,” ki’n ganny tire dan 1 Korentyen 7:29 pou ganny devlope.
2. Ki mannyer ou kapab esper sa lasanble avek lantouzyasm?
2 Osito ki dat pour lasanble spesyal i ganny anonse dan ou kongregasyon, konmans koz lo sa ki pou annan dan progranm avek lantouzyasm. Pour ed bann zanfan esper lasanble avek lantouzyasm, serten paran i mark sa dat lo kalandriye ansanm avek en lalis keksoz ki lafanmir i bezwen anmenn avek zot zour lasanble e apre zot kont zour ziska ki sa dat i arive. Pandan Letid Fanmir, petet ou pou anvi revwar bann not ki zot ti pran dan bann lasanble spesyal dan lepase. Ou osi kapab prepar ou leker pour sa levennman par revwar liv Benefisye atraver Ledikasyon Lekol Minister Teokratik paz 13-16, sa pou ed ou ek ou fanmir “fer byen atansyon konman zot ekoute.”—Lik 8:18.
3. Ki mannyer nou pou kapab benefisye plennman avek progranm ki pou ganny prezante?
3 Aplik sa ki ou aprann: Parol ki nou souvan tande apre lasanble i, “Sa lasanble ti vreman enteresan!” Sa i toultan leka, akoz sa i enn parmi sa bann provizyon byen ris ki sorti kot Zeova. (Prov. 10:22) Pour ki sa lenformasyon i raport fri, ou bezwen medit lo la e gard li antet. (Lik 8:15) Ler ou pe retourn dan lakour apre lasanble pran letan pour diskit lo progranm lasanble an fanmir oubyen avek bann ki vwayaz avek ou. Diskit lo lobzektif ki sakenn ant zot i annan ek bann pwen ki pou ed zot dan zot minister. Si zot fer sa, sa pou ede ki zot benefisye avek sa lenformasyon pour en bon pe letan apre lasanble.—Zak 1:25.
4. Akoz sa lasanble pou spesyal pour nou?
4 Kan nou ganny en kado ki itil ki nou vreman bezwen, sa i fer nou vreman kontan. Eski pa nou pe vreman esper avek enpasyans sa ki Zeova in anmas pour nou dan nou lasanble spesyal ki pe vini? Nou kapab asire ki sa lasanble pou vreman itil dan diferan fason. Nou kapab ekspekte pour resevwar sa pli bon kado sorti kot nou Papa dan lesyel, Zeova, ki vin atraver lankourazman ek formasyon ki i fourni nou pour nou fer sa travay ki in donn nou.—2 Tim. 4:2; Zak 1:17.