Rod bann ki merite
1. Ki mannyer nou demontre ki nou apresye sa privilez ki nou annan pour partisip dan predikasyon?
1 Pandan son minister, Zezi ti fer en gran zefor pour partaz mesaz rekonfor avek bann ki annan limilite. (Iza. 61:1, 2) Konman bann anbasader ek bann reprezantan Kris, ozordi nou apresye sa privilez ki nou annan pour imit li par rod byen bann ki merite dan nou teritwar avek perseverans.—Mat. 10:11; 2 Kor. 5:20.
2. Ki mannyer Pol ti adapte avek sa sityasyon ki i ti ladan e ki rezilta sa ti anmennen?
2 Adapte: Zapot Pol ti annan sa labitid pour premyerman pres avek bann Zwif ek bann ki ti’n konverti dan sinagog. (Akt 14:1) Kan li avek Silas ti dan lavil Filip, zot ti al rod dimoun kot ‘zot ti mazinen trouv en landrwa kot bann Zwif i rasanble pour fer lapriyer.’ Zot ti konmans rann temwannyaz avek detrwa madanm ki ti’n rasanble e enn parmi zot ki ti apel Lidi ti deswit aksepte laverite.—Akt 16:12-15.
3. Apard predikasyon portanport, ki lezot loportinite nou kapab gannyen pour rann temwannyaz?
3 Apard predikasyon portanport, eski ou kapab pres osi avek dimoun ki ou zwenn lo stenn bis oubyen lo bèstòp, dan zarden piblik, lofis, lo semen, dan bann landrwa biznes, bazar oubyen dan lavil dan ou teritwar? Petet ou kapab rann temwannyaz par let oubyen telefonn avek bann ki reste dan landrwa kot i annan baro sekirite ek apartman kot piblik pa annan drwa antre san permisyon. Kan ou obzerve e adapte avek diferan sityasyon ki egziste dan ou teritwar, sa pou permet ou “annan bokou keksoz pour fer dan travay Senyer.”—1 Kor. 15:58, NW.
4. Si teritwar nou kongregasyon i limite ki lezot opsyon nou annan?
4 Plizyer proklanmater in ganny sa loportinite pour ogmant zot travay prediksyon kan zot in kit sa kongregasyon ki zot ti ladan pour al dan en lot kongregasyon swa dan zot pei oubyen dan en lot pei. Lezot in aprann en lot langaz pour zot kapab pres avek dimoun ki sorti dan en lot pei.
5. Ki mannyer nou devret vwar sa letan ki nou pe viv ladan e ki nou devret determinen pour fer?
5 Nou tou nou bezwen gard antet ki “lemonn” i nou teritwar. (Mat. 9:37; 13:38) Anmezir ki nou gard antet ki lafen sa move lemonn i pros, sakenn de nou i bezwen analiz seryezman son sityasyon, talan, loportinite ki i annan, ek lezot posibilite pour ogmant son travay predikasyon. Zeova i donn nou sa lasirans ki si nou met lentere Rwayonm premye, i pou beni bann zefor senser ki nou fer pour ogmant nou travay predikasyon.—Mat. 6:33.