Kwen kestyon
◼ Akoz i neseser pour annan bon zizman kan nou pe servi telefonn pour ekout renyon?
Pour rezon maladi oubyen dezabilite, bokou kongregasyon in fer laranzman pour bann ki parfwa pa kapab asiste renyon kot Lasal Rwayonm, pour ekout renyon par telefonn kot zot lakour. I neseser pour annan bon zizman ek bon planifikasyon pour fer sir ki sa provizyon i ganny servi par bann ki vreman pa kapab asiste renyon. Alor bann ansyen ki sirvey sa laranzman pou anvi organiz e vey byen ki tou keksoz i deroul “byen e avek lord.”—1 Kor. 14:40.
Bann ansyen pou fer sir ki priyorite i al pour bann proklanmater dan zot kongregasyon ki annan maladi kronik oubyen problenm fizik ouswa pour bann ki pour en rezon ou en lot pa kapab kit lakour. En proklanmater ki malad pour en pe letan oubyen envalid, ouswa en etidyan Labib ki pe progrese me ki pa kapab kit lakour i osi kapab benefisye avek sa provizyon e ganny enkli kan pe kont lakantite dimoun dan lasistans. Kan napa sifizaman laliny telefonn pour konekte bann ki dan bezwen, petet lezot laranzman i kapab ganny fer. Par egzanp, renyon i kapab ganny rikorde pour zot.
Byensir nanryen pa kapab konpar byenfe ki nou gannyen kan nou personnelman prezan dan renyon. Kan nou asosye avek nou bann frer ek ser kot Lasal Rwayonm nou kapab ‘benefisye avek lankourazman kanmarad’ e ed bann nouvo pour pli byen apresye sa lenportans pour asiste renyon. Kan nou la prezan dan bann renyon, nou aprann en kantite avek bann demonstrasyon, bann ansyen i kapab ed nou personnelman e nou santi sa vre lanmour ki egziste parmi nou bann frer ek ser. Sa i leka pour en ser aze ki ti dir sa parol apre ki en ser ti’n may li ler i ti pe kit Lasal Rwayonm: “Ou pa kapab ganny sa par telefonn!”—Rom. 1:11, 12.
Ozordi osi, parey Ana ki “pa ti kit Tanp,” bokou frer ek ser aze i asiste renyon regilyerman tan ki zot lasante ek sirkonstans i permet zot. (Lik 2:36, 37) Kan i neseser zot servi konneksyon par telefonn, me zot pa servi li konman en leskiz pour pa asiste renyon kot Lasal Rwayonm. Annou imit zot legzanp e kontinyen fer bokou zefor avek lazwa pour la prezan kot nou bann renyon anmezir nou ador Zeova, nou Bondye.—Ps. 95:1-3, 6; 122:1.