Donn tou pour ou bann etidyan
1.Ki nou bezwen fer pour ed nou bann etidyan Labib?
1 Pour ou kapab ed en etidyan Labib ziska ki i dedye son lavi avek Zeova, ou bezwen fer plis ki zis etidye Labib avek li tou le semenn. Zapot Pol i konpar sa relasyon ki ti egziste ant li ek bann ki i ti ansennyen avek en manman ki pe pran swen avek son zanfan. Nou osi nou byen kontan pour ‘donn nou prop lavi’ oubyen donn tou pour ed nou etidyan progrese spirityelman.—1 Tesa. 2:7-9.
2.Akoz nou devret demontre en lentere senser e ki mannyer nou kapab fer sa?
2 Demontre en lentere senser: Anmezir ki en etidyan Labib i met an pratik sa ki i pe aprann, son konsyans pou pous li pour aret asosye avek bann ki pa viv an armoni avek bann prensip Labib. (1 Pyer 4:4) Son fanmir i kapab rezet li. (Mat. 10:34-36) Si nou montre en lentere senser dan li, sa i kapab ede pour konble sa bezwen emosyonnel ki i ti pe gannyen avek son fanmir. En misyonner eksperyanse i donn sa konsey: “Pa degaze pour ale apre ki ou’n fini fer letid. Si i apropriye, reste e koz en pti pe avek li.” Fodre ki ou touzour pare pour ofer ou etidyan led pratik. Par egzanp, eski ou pou kapab telefonn oubyen vizit li ler i malad? Si i apropriye, eski ou kapab asiz avek ou etidyan pandan renyon e ed li avek son zanfan?
3.Ki mannyer nou kapab ed nou bann etidyan ganny lankourazman bann frer ek ser dan kongregasyon?
3 Led ki kongregasyon i donnen: Si ou pe pres pros kot ou etidyan i reste akoz ou pa rann li en pti vizit e entrodwir li avek bann ki pe pres avek ou? Akoz detanzaot ou pa envit en diferan proklanmater, menm bann ansyen pour vin avek ou lo sa letid? Deswit apre ki ou’n konmans etidye avek en dimoun, ankouraz li pour asiste renyon kot Lasal Rwayonm. Sa pou permet li eksperyans bann moman byen ankourazan avek bann frer ek ser dan kongregasyon e zot a kapab vin son fanmir spirityel.—Mark 10:29, 30; Ebr. 10:24, 25.
4.Ki mannyer nou zefor i kapab ganny rekonpanse?
4 En paran ki fer en ta zefor pour ed son zanfan progrese spirityelman i ganny bokou lazwa kan son zanfan i pran kote avek Zeova e swiv laverite. (3 Zan 4) Nou kapab eksperyans sa menm kalite lazwa si nou donn tou pour ed nou bann etidyan Labib.