‘Lasazes i ganny rekonnet par bann aksyon’
1. Ki pwennvi serten i annan lo Temwen Zeova?
1 Parfwa en met lakour i kapab mal resevwar nou akoz i annan en move pwennvi lo nou oubyen i’n ganny fo lenformasyon lo Temwen Zeova. Petet son pwennvi in ganny enfliyanse par bann rapor negatif ki medya in fer. Dan serten landrwa nou’n ganny nonmen konman “en sekt danzere.” Ki mannyer nou merit azir letan nou fer fas avek sa bann kalite kritik?
2. Kwa ki pou ed nou pour evite santi nou dekouraze kan nou fer fas avek bann kritik?
2 Gard en latitid pozitif: Bann dimoun dan premye syek ti annan en move pwennvi lo Zezi ek lezot serviter Zeova e zot ti menm koz kont zot. (Akt 28:22) Pourtan, Zezi ek son bann disip pa ti les sa bann kritik fer zot onte pour prese. Zezi ti dir: ‘Lasazes i ganny rekonnet par son bann aksyon.’ (Mat. 11:18, 19) I ti kontinyen fer lavolonte son Papa avek devouman akoz i ti konfidan ki bann ki anvi konn laverite pou rekonnet valer sa bon nouvel. Si nou gard antet ki Garson Bondye osi ti ganny trete dan sa menm fason, sa pou anpes nou dekouraze
3. Akoz bann rapor negatif ek lopozisyon pa merit sirprann nou?
3 Zezi ti dir ki sa lemonn pou ay bann ki pou swiv li zis parey i ti ay li. (Zan 15:18-20) Alor, bann rapor negatif e lopozisyon ki nou gannyen ozordi pa merit sirprann nou. An realite, nou merit ekspekte ki sa bann keksoz pou ogmante anmezir ki sa bann dernyen zour i aprose e ki lakoler Satan i vin pli for. (Rev. 12:12) Nou kapab zwaye akoz sa i levidans ki sa lemonn Satan i pros pour ganny detrir.
4. Si nou mal ganny resevwar dan predikasyon, ki mannyer nou devret reponn?
4 Reponn dan en fason agreab: Kan nou mal ganny resevwar, nou merit toultan reponn dan en fason agreab e dous. (Prov. 15:1; Kol. 4:5, 6) Si sa sityasyon i permet, nou kapab eksplik en met lakour ki annan en leker senser ki i annan en kantite lenformasyon ki pa korek lo Temwen Zeova oubyen demann li akoz i santi koumsa. Si nou reponn dan en fason dous i kapab fer li dout sa ki i’n tande lo Temwen Zeova e ekoute laprosenn fwa ki en Temwen i vizit li. Par kont, si sa met lakour i byen ankoler, petet i pou pli bon si nou zantiman kit son lakour. Nou pa pou fatig nou avek lafason ki lezot i vwar nou akoz nou annan lasirans ki pour Zeova nou minister i annan bokou valer.—Iza. 52:7.