Devlop sa labitid pour toultan a ler
1. Ki legzanp Zeova in kite konsernan ponktyalite?
1 Zeova i toultan a ler. Par egzanp, i “ed nou dan moman neseser.” (Ebr. 4:16) I osi donn “manze [spirityel] kan i ler.” (Mat. 24:45) Alor nou kapab asire ki son zour lakoler ki pe vini “pa pou an retar.” (Aba. 2:3) Pa nou vreman benefisye avek ponktyalite Zeova! (Ps. 70:5) Konman imen enparfe ki byen okipe, parfwa i en defi pour nou toultan a ler. Akoz nou devret devlop sa labitid pour toultan a ler?
2. Akoz ponktyalite i onor Zeova?
2 Pandan sa bann dernyen zour, pour bokou dimoun ponktyalite in vin en keksoz difisil akoz zot mazin zis zot lentere e zot napa kontrol lo zot lekor. (2 Tim. 3:1-3) Alor kan en Kretyen i toultan a ler dan travay, pour bann apwentman ek renyon, lezot i remarke e sa i onor Zeova. (1 Pyer 2:12) Eski nou toultan ariv travay a ler me nou souvan an retar pour bann renyon kongregasyon? Ler nou ariv a ler pour bann renyon Kretyen, enkli pour kantik ek lapriyer, sa i montre nou dezir pour imit nou Papa dan lesyel ki kontan lord.—1 Kor. 14:33, 40.
3. Akoz ponktyalite i demontre ki nou pran konsiderasyon pour lezot?
3 Ler nou toultan a ler, nou demontre konsiderasyon pour lezot. (Fili. 2:3, 4) Par egzanp, kan nou a ler pour bann renyon Kretyen, enkli renyon predikasyon, nou pa pou deranz lezot proklanmater. De lot kote, si nou annan sa labitid pour ariv an retar, i donn lezot lenpresyon ki nou konsider nou letan pli enportan ki pour zot. Ponktyalite i demontre ki nou fidel, devoue e diny konfyans, bann kalite ki lezot otour nou i apresye.
4. Ki mannyer nou kapab amelyore si nou souvan an retar?
4 Si ou toultan an retar, reflesir akoz sa i leka. Organiz ou lekor par fer en progranm ki permet ou fini tou sa ki ou annan pour fer a ler. (Ekle. 3:1; Fili. 1:10, NW) Demann Zeova led. (1 Zan 5:14) Ler nou toultan a ler, sa i en fason pour demontre nou lapresyasyon pour sa de pli gran komannman, kontan Bondye ek nou prosen.—Mat. 22:37-39.