Annan konfyans ki Zeova pou protez nou ler i met en lafen avek sa move lemonn

Tre byento Zeova pou aret annan pasyans avek sa move lemonn. Fo larelizyon pou ganny detrir, plizyer nasyon pou ralye ansanm pour atak pep Bondye e Zeova pou detri bann move dimoun zour Armagedon. Bann Kretyen i enpasyan pour vwar sa bann levennman enportan e eksitan.

Byensir, nou pa konn tou detay konsernan gran ladetres. Par egzanp, nou pa konn egzakteman kan i pou konmanse. Nou pa konnen ki rezon bann politisyen pou donnen ler zot pou atak bann larelizyon. Nou pa konnen ki kantite letan e dan ki fason bann nasyon pou atak pep Bondye. Nou osi pa konn egzakteman ki Zeova pou servi pour detri bann move dimoun zour Armagedon.

Par kont Labib i donn nou tou lenformasyon ki nou bezwen pour fer fas avek sa ki pou arive a lavenir avek konfidans ek kouraz. Par egzanp, nou konnen ki nou pe viv dan “bann dernyen zour.” (2Ti 3:1) Nou konnen ki sa latak lo larelizyon pou “ganny akoursi” pour ki sa vre larelizyon pa ganny detrir. (Mt 24:22) Nou konnen ki Zeova pou delivre son pep. (2Pyr 2:9) Nou osi konnen ki sa Enn ki Zeova in swazir pour detri bann move dimoun e pour sov sa gran lafoul zour Armagedon i zis e pwisan.​—Re 19:11, 15, 16.

Sa bann levennman dan lavenir pou sirman fer dimoun “tonm feb akoz lafreyer.” Me ler nou lir e medit lo lafason ki Zeova ti sov son pep dan lepase, osi lo sa ki i’n dir konsernan lavenir, nou pou kapab “debout drwat e lev [nou] latet” e annan konfyans ki nou delivrans i pros.​—Li 21:26, 28.