Zeova ti ed nou pour ‘fleri kot nou’n ganny plante’

Mats ek Ann-Catrin Kassholm ti asiste Lekol Gilead an 1979 e pandan bann lannen ki’n pase, zot in ganny “plante” oubyen ganny demande pour servi dan bann pei parey Iran, Moris, Myannmar, Latanzani, Yougannda ek Zair. Pandan Lekol Gilead, zot ti tann Jack Redford, ki ti en formater dan sa lekol, donn en konsey ki’n ed zot pandan sa plizyer fwa ki zot in ganny “plante,” “derasinen” e“replante.” Annou les zot rakont nou.

Mats, premyerman dir nou ki mannyer ou ti konn laverite.

Mats: Pandan Dezyenm Lager Mondyal, mon papa ti pe reste Polenn e pandan sa letan, i ti vwar ki Legliz Katolik ti vreman ipokrit. Me kantmenm sa, i ti souvan dir: “I bezwen annan en vre larelizyon kekpar.” Pli tar, mon ti realize ki i ti annan rezon. Mon ti aste en kantite liv dezyenmmen. Parmi bann liv ki mon ti aste, i ti annan en liv ble ki annan pour tit The Truth That Leads to Eternal Life. Sa tit ti vreman enteresan e mon ti lir sa liv sa menm zour swar. Lannmen bomaten, mon ti konnen ki mon ti’n trouv laverite.

Apartir Avril 1972, mon ti lir plizyer lezot liv ki Temwen Zeova ti’n pibliye e mon ti trouv larepons bann kestyon ki mon ti annan konsernan Labib. Mon ti santi parey sa marsan ki Zezi i koz lo la dan en legzanp, ki ti vann tou sa ki i ti annan pour aste en perl ki i ti’n vwar ki ti annan en gran valer. Mon ti deside pour servi Zeova olye al liniversite pour vin en dokter. Mon ti “vann” mon bann plan pour aste sa “perl.” (Mat. 13:45, 46) Mon ti batize le 10 Desanm 1972.

Dan lespas enn an, mon paran ek mon pti frer ti aksepte laverite e batize zot osi. An Zilyet 1973, mon ti konmans servis a plen tan. Parmi bann pionye devoue dan nou kongregasyon, i ti annan en zoli ser ki ti apel Ann-Catrin ki ti kontan Zeova en kantite. Nou ti tonm anmoure e an 1975, nou ti marye. Pour sa prosen kat-r-an, nou ti reste dan en lavil ki apel Strömsund, ki en zoli landrwa Laswed kot en kantite dimoun ti anvi aprann konsernan Labib.

Ann-Catrin: Mon papa ti aprann laverite pandan ki i ti dan liniversite Stokolm. Sa letan mon ti annan zis trwa mwan me i ti anmenn mwan renyon e dan predikasyon. Mon manman pa ti kontan sa e i ti esey montre ki Temwen Zeova ti mal. Me i pa ti kapab. Alor avek letan, li osi i ti batize. Mon ti batize ler mon ti annan 13 an e ler mon ti annan 16 an mon ti konmans fer pionye. Mon ti servi dan en landrwa ki apel Umeå, kot i ti annan bezwen pour plis proklanmater e apre sa mon ti vin en pionye spesyal.

Apre ki nou ti’n marye nou de Mats, nou’n annan sa lazwa pour ed plizyer dimoun aprann laverite. Parmi, i Maivor, en fiy adolesan ki’n aret fer sport konman en karyer pour li kapab fer plis dan servis Zeova. Maivor ti vin en pionye e i ti vin konpanyon servis mon pti ser. Zot ti asiste Lekol Gilead an 1984 e zot pe servi konman misyonner Ekwador.

Ki mannyer zot in swiv sa konsey pour ‘fleri kot zot in ganny plante’ dan zot servis misyonner?

Mats: Nou ti ganny demande pour sanz servis souvan. Me nou ti esey reste “anrasinen” dan Zezi par fer nou mye pour swiv son legzanp, sirtou par demontre limilite. (Kol. 2:6, 7) Par egzanp, dan plas ekspekte ki bann frer ek ser i adapte avek nou fason fer, nou ti esey aprann akoz zot ti fer keksoz dan en serten fason. Nou ti anvi konpran zot fason panse ek kiltir. Pli nou ti swiv legzanp Zezi, pli nou ti santi ki nou ti’n ganny “plante o bor bann pti larivyer” pour nou kapab fleri kot nou ti ete.—Ps. 1:2, 3.

Ann-Catrin: Pour en plant kapab pouse apre ki i’n ganny replante, i bezwen soley. Zeova in toultan parey “en soley” pour nou. (Ps. 84:11) I’n donn nou bann frer ek ser dan kongregasyon ki kontan nou. Par egzanp, dan nou pti kongregasyon Teran, Iran, bann frer ek ser ti demontre lospitalite parey bann dimoun dan letan Labib ti demontre. Nou ti pou’n kontan reste Iran me an Zilyet 1980, Temwen Zeova ti ganny enterdi laba e nou ti ganny donnen 48 erdtan pour kit sa pei. Nou ti ganny demande pour al servi Zair (ki aprezan i ganny apele Kongo) Lafrik.

Ler mon ti konnen ki nou ti pe al servi Lafrik, mon ti plere. Sa ki mon ti’n tande konsernan bann serpan ek maladi ki i ti annan Lafrik ti fer mwan per. Me nou ti annan de bon zanmi ki ti’n servi laba pour en kantite lannen e zot ti dir nou: “Pa bezwen per. Zot pa’n deza al Lafrik me nou konnen zot pou kontan laba.” Zot ti annan rezon. Bann frer ek ser ti demontre lanmour e zot ti zantiy. Anfet, si-z-an pli tar ler sa travay predikasyon laba ti ganny enterdi e nou ti bezwen kit Zair, mon ti riye parski mon ti realize ki aprezan mon ti pe priy Zeova pour les nou reste Lafrik.

Ki bann benediksyon ki zot in gannyen pandan sa bann lannen?

Mats: Mon kapab dir ki nou’n fer bann bon lanmitye avek lezot misyonner ki’n sorti dan diferan pei e ki annan diferan kiltir. Osi, dan serten pei kot nou’n servi, nou’n ganny en kantite lazwa ler nou’n fer letid Labib. Parfwa nou ti annan 20 letid Labib sakenn. Mon pa pou zanmen oubliy lanmour ek lospitalite ki bann frer ek ser Lafrik ti demontre anver nou. Ler nou ti vizit bann kongregasyon Latanzani, nou ti dormi dan nou transpor ki ti en Volkswagen Kombi e bann frer ek ser ti fer sir ki nou ti annan tou sa ki nou ti bezwen menm si zot ti vreman pov. (2 Kor. 8:3) En keksoz ki nou ti vreman kontan i sa ki nou ti apel story time. Sa ti ler nou de Ann-Catrin, nou ti asize a lafen lazournen pour koz lo sa ki’n arive pandan lazournen e remersye Zeova pour son led.

Ann-Catrin: Mwan, mon’n kontan pour aprann konn bann frer ek ser partou dan lemonn. Nou’n aprann bann nouvo langaz par egzanp, Farsi, Franse, Lougannda ek Swayli e nou’n eksperyans diferan kiltir. Nou’n ansenny bann nouvo disip, fer bann vre zanmi e travay “ansanm [avek zot] dan linite” dan servis Zeova.—Zef. 3:9.

Nou ti osi vwar en kantite zoli keksoz dan kreasyon Zeova. Sak fwa nou ti aksepte en nouvo servis, nou ti santi konmsi Zeova ti avek nou dan sa vwayaz e i ti pe gid nou. I’n ansenny nou bann keksoz ki nou pa ti pou zanmen aprann lo nou menm.

Ki bann difikilte zot in gannyen e kwa ki’n ed zot pour andire?

Mats: Pandan bann lannen, nou’n ganny plizyer maladi parey malarya. Ann-Catrin in bezwen fer plizyer loperasyon irzan. Nou ti osi enkyet pour nou paran akoz zot ti pe vye e zot ti bezwen led. Alor nou rekonesan anver nou bann frer ek ser ki’n pran swen avek nou paran. Zot ti pran swen avek nou paran e demontre pasyans, lazwa ek lanmour. (1 Tim. 5:4) Nou ti fer tou sa ki nou kapab pour ede menm si nou ti reste lwen me parfwa nou ti santi nou koupab parski nou ti swete ki nou ti kapab fer plis pour zot.

Ann-Catrin: An 1983, ler nou ti Zair, mon ti ganny kolera e sa ti fer mwan vreman malad. Dokter ti dir Mats: “Anmenn li dan en lot pei ozordi menm!” Son lannmen, nou ti kit sa pei lo en avyon kargo ki ti sa sel vol ki ti annan e nou ti al Laswed.

Mats: Nou ti plere parski nou ti krwar ki nou ti pou bezwen aret nou servis misyonner. Me kontrerman avek sa ki dokter ti’n dir, Ann-Catrin ti rekipere. Enn an pli tar, nou ti kapab retourn Zair, safwasi dan en pti kongregasyon Swayli ki baze Lubumbashi.

Ann-Catrin: Ler nou ti Lubumbashi, mon ti ansent me mon pti baba ti mor avan i ti ne. Menm si nou pa ti’n plàn pour annan en pti baba, mon ti vreman sagren ler i ti mor. Pandan sa moman difisil, Zeova ti donn nou en kado ki nou pa ti pe ekspekte. Nou ti plis letid Labib ki oparavan. Dan mwens ki enn an, lakantite proklanmater ti ogmante sorti 35 pour al 70 e lakantite dimoun ki ti asiste renyon ti ogmante sorti 40 pour al 220. Nou ti vreman bizi dan predikasyon. Zeova ti beni nou zefor e sa ti rekonfort mwan. Kantmenm sa, souvandfwa nou mazin e koz lo nou pti baba. Nou vreman eksite pour vwar lafason ki Zeova pou rekonfort nou konpletman dan paradi.

Mats: I ti annan en letan Ann-Catrin ti vreman fay e fatige. Dokter ti dir mwan ki mon ti annan kanser kolon e ki mon ti bezwen fer en gran loperasyon. Me aprezan mon byen e Ann-Catrin pe fer tou sa ki i kapab dan son servis.

Nou’n realize ki pa zis nou ki pas dan problenm. Apre sa zenosid ki ti arive Rwannda an 1994, nou ti vizit en kantite frer ek ser ki ti dan bann kan refizye. Sa bann frer ek ser ti demontre lafwa, landirans ek lospitalite e sa ti ansenny nou ki Zeova i annan sa pouvwar pour soutenir son pep dan nenport problenm ki zot pas ladan.—Ps. 55:22.

Ann-Catrin: En lot problenm ti arive ler nou ti asiste dedikasyon biro brans Yougannda an 2007. Apre sa levennman, nou ti pe retourn Nayrobi, Kenya avek en group misyonner ek Betelit. Avan nou ti ariv lafrontyer Kenya, en kanmiyon ti koup devan nou e tap avek nou. Sa drayver e senk parmi nou bann zanmi tir mor sibit e en ser ti mor pli tar dan lopital. Nou vreman anvi vwar nou bann zanmi ankor.—Zob 14:13-15.

Ptitapti, mon ti rekipere fizikman. Me nou de Mats e plizyer lezot pasaze ki ti dan sa aksidan, ti kontinyen soufer emosyonnelman akoz nou ti’n ganny tromatize. Dan mon ka, mon ti leve dan lannwit parski mon ti enkyet e sa ti fer mwan santi konmsi mon pe ganny en latak leker. Sa ti fer per. Me nou ti priy Zeova, lir e medit lo serten nou bann verse prefere e sa ti ed nou pour andire. Nou ti osi al kot bann dokter ki tret bann dimoun ki annan bokou lenkyetid e sa ti ed nou en kantite. Aprezan nou pli kapab kontrol sa bann sentonm e nou demann Zeova pour ed nou rekonfort lezot ki pe fer fas avek menm difikilte.

Ler zot ti pe koz lo lafason ki zot in kapab andire dan bann sityasyon difisil, zot ti dir ki Zeova in anmenn zot “parey dizef kri.” Ki zot ti pe esey dir?

Mats: Sa lekspresyon i sorti dan langaz Swayli e i al koumsa: “Tumebebwa kama mayai mabichi” oubyen “Nou ti ganny anmennen parey dizef kri.” Zis parey en dimoun i fer byen atansyon ler i pe anmenn dizef kri pour anpes li kase, Zeova in siport nou avek tandres dan tou bann servis ki nou’n annan. Nou’n toultan annan sa ki nou bezwen, menm plis. En fason ki nou’n santi lanmour ek sipor Zeova, i atraver lafason ki Konsey Direkter in konpran nou.

Ann-Catrin: Mon ti pou kontan koz lo en moman kot nou’n santi sipor ek tandres Zeova. En zour, mon ti ganny en call e mon ti ganny dir ki mon papa i dan swen entansif dan en lopital Laswed. Mats ti’n fek rekipere apre ki i ti’n ganny malarya e nou ti napa larzan pour pey en tiket avyon pour retourn dan lakour. Nou ti deside pour vann nou loto. Apre, en koup ki ti’n tann konsernan nou sityasyon ti telefonn nou e dir ki zot ti anvi pey en tiket avyon pour nou. Apre sa, nou ti ganny en lot call e safwasi i ti en ser aze ki ti’n anmas en pe larzan dan en bwat ki i ti’n apel “Pour en dimoun dan bezwen.” Dan lespas detrwa minit, Zeova ti’n ed nou.—Ebr. 13:6.

Ki zot in aprann pandan sa 50 an ki zot in pase dan servis a plen tan?

Ann-Catrin: Mon’n aprann ki nou pou annan lafors si nou “reste kalm e annan konfyans.” Ler nou annan konfyans dan Zeova, Zeova i lager pour nou. (Iza. 30:15; 2 Kron. 20:15, 17) Vi ki nou’n donn Zeova nou meyer dan sak servis ki nou’n annan, nou’n ganny plis benediksyon ki nou ti pou gannyen si nou ti’n fer lezot keksoz.

Mats: Sa leson pli enportan ki mon’n aprann i ki si mon depan lo Zeova dan tou sityasyon, mon pou vwar ki i pou ed mwan. (Ps. 37:5) I’n toultan ed nou zis parey in promet. I ankor pe ed nou dan nou servis dan Betel Myannmar.

Nou swete ki bann zenn ki anvi fer plis dan zot servis pour Zeova pou santi sa menm lanmour fidel ki Zeova in demontre anver nou. Nou asire ki zot pou eksperyans sa menm lanmour fidel si zot les Zeova ed zot fleri, nenport landrwa kot zot in ganny plante.