Ed ou zanfan annan kontrol lo son lekor

KI SAVEDIR ANNAN KONTROL LO NOU LEKOR?

Annan kontrol lo nou lekor i enkli sa abilite pour

• espere olye ganny tou sa ki nou anvi vitman

• pa fer keksoz san reflesir

• fini sa ki ou annan pour fer menm si ou pa anvi fer li

• met lentere lezot dimoun premye

AKOZ I ENPORTAN ANNAN KONTROL LO NOU LEKOR?

Bann zanfan ki annan kontrol lo zot lekor i kapab reziste tantasyon, menm si sa tantasyon i paret en keksoz ki zot ti pou kontan fer. Par kont, bann zanfan ki napa ase kontrol lo zot lekor i tre probab ki zot pou

• pli agresiv

• soufer avek depresyon

• fimen, pran drog oubyen lalkol

• napa en ladyet balanse

En letid i montre ki bann zanfan ki annan kontrol lo zot lekor, ler zot vin adilt zot ganny mwens problenm lasante, problenm larzan e mwens problenm avek lalwa. Sa letid ti fer Profeser Angela Duckworth ki sorti University of Pennsylvania dir: “I pa zanmen mal pour annan kontrol lo ou prop lekor.”

KONMAN POUR ED OU ZANFAN ANNAN KONTROL LO SON LEKOR

Aprann dir non e gard ou parol.

PRENSIP LABIB: “Fer sir ki ou ‘Wi’ i wi e ou ‘Non’ i non.”​—Matye 5:37.

Bann zanfan i kapab konmans teste zot paran ler zot kriye, pile e zet zot lekor ater petet menm dan piblik. Si sa zanfan i konnen ki ler i kriye oubyen plere i en pli bon fason pour son paran aksepte sa ki in demande, i pou fer sanmenm.

De lot kote, si sa paran i dir non e gard son parol, sa zanfan pou aprann ki dan lavi nou pa kapab toultan ganny sa ki nou anvi. Dr. David Walsh i dir: “Menm si dimoun i krwar ki ler zot ganny tou sa ki zot anvi zot ere, i pa vreman leka. Par kont, dimoun ki’n aprann annan kontrol lo zot lekor i bokou pli ere. Nou pa pe ed nou zanfan ler nou pe les zot grandi avek sa nide ki zot kapab ganny tou sa ki zot anvi dan en plato.”a

Si pli tar ou zanfan i ganny tante pour pran drog, fer sèks avan maryaz oubyen fer lezot keksoz ki kapab danzere, i pou pli fasil pour li annan kontrol lo son lekor si depi la konmela ou pa donn li tou sa ki i anvi.

Ed ou zanfan konnen ki i annan bon konsekans ek move konsekans.

PRENSIP LABIB: “Sa ki en dimoun pe senmen, sanmenm ki i pou rekolte osi.”​—Galat 6:7.

Ou zanfan i bezwen konpran ki tou aksyon i annan son konsekans e si i napa kontrol lo son lekor i pou annan move konsekans. Par egzanp, si ou zanfan i ankoler vitman petet dimoun pou tant pour evit li. De lot kote, si i kapab demontre kontrol lo son lekor ler lezot i esey fer li ankoler oubyen si i kapab reste trankil san enteronp sa dimoun ler i pe koze, dimoun pou kontan li. Ed ou zanfan konpran ki i pou pli byen ler i annan kontrol lo son lekor.

Montre ou zanfan kwa ki pli enportan.

PRENSIP LABIB: “Verifye sa ki pli enportan.”​—Filipyen 1:10.

Annan kontrol lo nou lekor pa zis vedir pa fer sa ki mal, i osi enkli fer sa ki bezwen ganny fer menm si ou pa kontan. I enportan pour ou zanfan konn son priyorite e toultan fer li avan lezot keksoz. Par egzanp, fer li konpran ki i devret fer son homework avan apre sa i kapab al zwe.

Vin en bon legzanp.

PRENSIP LABIB: “Mon’n kit en legzanp pour zot, pour ki parey mon’n fer avek zot, zot osi zot devret fer parey.”​—Zan 13:15.

Ou zanfan pour vwar ki mannyer ou reakte ler en keksoz i arive ki fer ou ankoler. Montre ou zanfan ki ler ou annan kontrol lo ou lekor tou keksoz i al byen. Par egzanp, ler ou zanfan i fer en keksoz mal, eski ou reakte avek lakoler oubyen ou reste kalm?