Ed ou zanfan annan valer moral

KI SAVEDIR VALER MORAL?

Dimoun ki annan bon valer moral i konpran kwa ki byen e kwa ki mal. Pour zot sa ki byen ek sa ki mal pa depan lo fason ki zot santi zot. O kontrer, valer moral i baze lo bann prensip ki gid zot fason viv menm ler personn pa vwar zot.

AKOZ VALER MORAL I ENPORTAN?

Bann zanfan i ganny bonbarde avek diferan fo nide lo kwa ki byen e kwa ki mal ki swa kot lekol, dan lanmizik ki zot ekoute, sa ki zot vwar lo televizyon oubyen dan film. Sa bann keksoz i kapab fer zot konmans kestyonn sa ki zot in aprann lo valer moral.

Sa i en gro problenm sirtou pour bann adolesan. Sa liv Beyond the Big Talk, i dir ki zot “bezwen konpran ki dimoun pou met presyon lo zot pour konport zot dan serten fason pour ki lezot dimoun i aksepte zot. Zot bezwen aprann fer sa ki zot konnen i byen menm si zot zanmi pa kontan.” I kler ki paran i devret montre zot zanfan sa bann keksoz avan zot vin adolesan.

KI MANNYER POUR MONTRE VALER MORAL?

Montre byen kler kwa ki byen e kwa ki mal.

PRENSIP LABIB: ‘Dimoun matir . . . i servi zot abilite pour zize pour zot kapab fer diferans ant sa ki byen ek sa ki mal.’​—Ebre 5:14.

• Servi bann mo ki montre ki en keksoz i byen ouswa mal. Servi bann sityasyon dan lavi toulezour e montre bann diferans. Par egzanp ou kapab dir ou zanfan: “Sa i onnet e sa i pa onnet, sa i fidel e sa pa fidel.” “Sa i labonte e sa pa labonte.” Avek letan, ou zanfan pou aprann kwa ki byen pour li fer e kwa ki mal pour li pa fer.

• Eksplik ou zanfan akoz en keksoz i byen ouswa mal. Par egzanp, demann bann kestyon tel parey: Akoz i pli bon pour onnet? Ki mannyer ler nou koz manti sa i gat bann lanmitye? Akoz i mal pour vole? Rezonn byen avek ou zanfan pour ed li konnen kwa ki byen e kwa ki mal.

• Montre akoz i enportan konnen kwa ki byen e kwa ki mal. Ou kapab dir: “Si ou onnet lezot dimoun pou annan konfyans dan ou” oubyen “si ou demontre labonte dimoun pou kontan ou.”

Fer sir ou fanmir antye i viv dapre bann bon valer moral.

PRENSIP LABIB: “Kontinyen fer sir ki kalite dimoun zot ete.”​—2 Korentyen 13:5.

• Ou devret demontre bann bon valer moral dan fanmir pour ki ou kapab dir:

  • “Dan nou fanmir nou pa koz manti.”

  • “Nou pa tap oubyen kriy avek kanmarad.”

  • “Nou pa ensilte kanmarad.”

Ou zanfan pou vwar ki valer moral pa zis bann lalwa ki nou bezwen swiv me ki sa i en bon repitasyon ki nou fanmir i annan.

• Tanzantan koz lo sa ki ou krwar i byen oubyen mal avek ou zanfan. Servi bann sityasyon dan lavi toulezour pour ansenny ou zanfan. Ou kapab konpar ou bann valer moral avek sa ki ganny dir lo medya oubyen lekol lo sa size. Demann ou zanfan kestyon parey: “Ki ou ti pou’n fer?” “Ki mannyer nou fanmir ti pou rezourd sa problenm?”

Ankouraz ou zanfan pour toultan fer sa ki byen.

PRENSIP LABIB: “Gard en konsyans kler.”​—1 Pyer 3:16.

• Felisit ou zanfan. Si ou zanfan i fer sa ki byen, felisit li pour sa ki in fer e eksplik li akoz i ti byen. Par egzanp, ou kapab dir: “Ou onnet. Ou fer mon fyer.” Si ou zanfan i dir ou en keksoz mal ki in fer, remersye li pour son lonnekte avan e apre sa ou kapab koriz li.

• Koriz ou zanfan. Ed ou zanfan aksepte responsabilite pour son aksyon. Bann zanfan i devret konnen kwa ki zot in fer mal e ki mannyer zot fason azir i diferan avek fason ki zot fanmir i konport zot normalman. Alor serten paran pa dir zot zanfan sa ki zot fer mal akoz zot pa anvi dekouraz zot zanfan. Me ler bann paran i koz avek zot zanfan lo sa ki zot in fer mal, sa pou ed sa zanfan antrenn son konsyans pour anpes li fer en keksoz mal a lavenir.