EN LEMONN DAN BOULVERS

4 | Gard ou lespwar antet

AKOZ I ENPORTAN

Dimoun ki trakase avek sa ki pe arive dan sa lemonn ki dan boulvers, i kapab ganny afekte emosyonnelman e fizikman. Bokou dimoun ki’n ganny afekte avek sa bann levennman pa krwar ki sityasyon pou amelyore. Ki mannyer zot reazir?

Serten i refize pour mazin lo lavenir.
Lezot i servi lalkol oubyen drog pour evite mazin lo zot problenm.
I annan lezot ki santi ki i pa vo lapenn viv. Zot demande, “Akfer kontinyen viv?”

Sa ki ou devret konnen

Serten sa bann problenm ki ou pe fer fas avek i kapab tanporer e keksoz i kapab sanze e vin pli meyer san ki ou ekspekte.
Menm si ou sityasyon pa sanze, i annan keksoz ki ou kapab fer pour ed ou andire.
Labib i promet en solisyon permanan pour tou bann problenm ki imen i annan.

Sa ki ou kapab fer la konmela

Labib i dir: “Pa zanmen trakas pour demen, parski demen pou annan son prop traka. Sak zour i annan son prop problenm.”—Matye 6:34.

Pran en zour a la fwa. Pa tro trakase konsernan lavenir akoz sa pou anpes ou fer bann keksoz ki ou devret fer ozordi.

Ler ou tro trakase lo bann keksoz negatif ki kapab arive, sa pou zis fer ou pli strese e afebli ou lespwar pour en meyer lavenir.

KI OU KAPAB FER? Sizesyon

KONSANTRE LO BANN BON KEKSOZ

Labib i dir: “Tou le zour i en move zour pour en dimoun ki pe soufer, me en dimoun ki son leker i kontan i toultan pe fer lafet.” (Proverb 15:15) Si ou konsantre tro bokou lo sa problenm, ou kapab pa vwar ki i annan en solisyon. Me en latitid pozitif i kapab ed ou pour mazin bann fason pour fer fas avek ou sityasyon.

Pa pas tro bokou letan pour get nouvel.
A lafen sak zour, mazin de oubyen trwa keksoz ki ou’n apresye.
Fer en lalis e ekri zis bann keksoz ki ou bezwen fer ozordi. Dan plas fer bann gro louvraz, fer bann pti louvraz pour ki ou kapab vwar zefor ki ou’n fer a lafen lazournen.

ROD LED

Labib i dir: “En dimoun ki pa frekant personn . . . pa aksepte lasazes.” (Proverb 18:1) Ou pa kapab sorti dan en trou ki fon lo ou menm, me si ou ganny led ou kapab reisi.

Demann ou manm fanmir oubyen zanmi pour ed ou.
Ou osi kapab rod bann fason ki ou kapab ed zot. Ler ou fer keksoz pour lezot, sa pou ed ou annan en bon pwennvi lo ou bann problenm.
Si ou’n perdi lespwar e ou santi ki i pa vo lapenn viv, esey al vwar en dokter. Parfwa letan ou pe santi koumsa, i en siny ki ou pe ganny en problenm lasante parey depresyon. Bokou dimoun in ganny led ler zot in al rod tretman.a

a Sa magazin pa ankouraz dimoun pran okenn tretman spesifik.

Labib i ofer en vre lespwar

En psalmis ti dir dan en lapriyer ki i ti fer avek Bondye: “Ou parol i en lalanp pour mon lipye e en lalimyer pour mon semen.” (Psonm 119:105) Vwar ki mannyer Labib, Parol Bondye i vre.

Dan lannwit, en lalanp i ed nou deside kote pour marse. Pareyman, dan Labib i annan lasazes pratik ki kapab gid nou ler nou bezwen fer en desizyon difisil.

En lalimyer i kapab kler nou semen pour nou vwar sa ki devan nou. Dan menm fason, Labib i kapab montre nou ki i annan en lespwar pour en meyer lavenir.