Kreasyon ziska Deliz

Kote lesyel ek later i sorti? Konman ki soley, lalin ek bann zetwal, ek sa kantite keksoz ki lo later in egziste? Labib i donn vre larepons kan i dir ki zot ti ganny kree par Bondye. Alor nou liv i konmans avek bann zistwar Labib konsernan kreasyon.

Premye kreasyon Bondye ti bann personnaz envizib, zot ti en pe parey Bondye. Zot ti bann lanz. Me later ti ganny kree pour bann dimoun parey nou viv lo la. Bondye ti kree en msye ek en madanm, zot ti apel Adan ek Ev. I ti met zot dan en zoli zarden. Me zot ti dezobei Bondye e zot ti perdi sa drwa pour kontinyen viv.

An tou, depi kreasyon ziska sa gran deliz, ti annan 1,656 lannen. Pandan sa letan ti annan bokou move dimoun ki ti pe viv. Dan lesyel, ti annan sa bann personnaz envizib, Satan ek son bann move lanz. Lo later, ti annan Kaen ek en kantite lezot move dimoun, enkli bann zonm ki ti tre for. Me ti annan osi bann bon dimoun lo later—Abel, Enok ek Noe. Dan sa premye parti nou pou aprann en pe lo sa bann dimoun e sa ki zot ti fer.