Gideonn ek son 300 zonm

ESKI ou vwar ki pe arive la? Tousala i bann zonm lager. Bann zonm ki pe bese zot pe bwar delo. Sa zonm ki pe debout pre avek zot se Gideonn. I pe gete konman zot bwar delo.

Get byen bann diferan fason ki sa bann zonm pe bwar delo. Serten in koste zot figir pre avek delo. Me enn pe pran delo avek son lanmen, pour li kapab vwar ki pe pase otour li. Sa i enportan, akoz Zeova ti’n demann Gideonn pour swazir selman bann zonm ki kontinyen veye pandan ki zot bwar delo. Bondye ti dir ki larestan ti devret retourn kot zot. Annou vwar akoz.

Ankor enn fwa bann Izraelit ti rankontre en kantite problenm. Rezon se akoz zot pa ti obeir Zeova. Bann dimoun an Madyann ti ganny pouvwar lo zot e ti pe fer zot ditor. Alor bann Izraelit ti demann Zeova led, e Zeova ti ekout zot.

Zeova ti demann Gideonn pour rasanble en larme, alor Gideonn ti rasanble 32,000 zonm lager. Me lakantite larme ki ti’n vin lager kont Izrael ti 135,000 zonm. E alor Zeova ti dir avek Gideonn: ‘Ou annan tro bokou zonm.’ Akoz Zeova ti dir sa?

Akoz si Izrael ti ranport laviktwar, zot ti pou kapab krwar ki zot ti’n ranport laviktwar par zot menm. Zot ti kapab krwar ki zot pa ti bezwen led Zeova pour ed zot ranport laviktwar. Alor Zeova ti dir avek Gideonn: ‘Dir avek bann zonm ki per retourn kot zot.’ Kan Gideonn ti fer sa, 22,000 zonm lager ti retourn kot zot. Sa ti fer ki ti reste selman 10,000 zonm pour lager kont sa 135,000 solda.

Me, ekoute! Zeova ti dir: ‘Ou ankor annan tro bokou zonm.’ Alor i ti demann Gideonn pour fer bann zonm bwar delo dan sa larivyer e fer bann ki bes zot latet pour bwar delo retourn kot zot. Zeova ti promet: ‘Mon pou fer ou ranport laviktwar avek sa 300 zonm ki kontinyen veye anmenmtan ki zot bwar delo.’

Zour pour lager ti arive. Gideonn ti diviz son 300 zonm dan trwa group. I ti donn sak zonm en tronpet ek en vaz avek en flanbo ladan. Anviron minwi, zot ti antour kan zot bann lennmi. Apre, anmenmtan, zot tou zot ti soufle zot tronpet e kas zot vaz, e kriye: ‘Sab Zeova e Gideonn!’ Kan zot bann lennmi ti leve, zot ti konfize e zot ti per. Zot ti konmans taye, e bann Izraelit ti ranport laviktwar.